Su lunis de Pasca de ocannu, sa prima die de abrile, at a èssere afestadu in mùsica in S’Alighera e in Portu Turres.
In s’antiga capitale turritana sa manifestatzione, organizada dae s’amministratzione comunale paris cun su CCN (Centro Commerciale Naturale) Botteghe Turritane, est in programma a inghìriu de sa turre aragonesa, a fache a mare.
Si cumintzat a sas deghe de mangianu, cando ant a abèrrere s’àrea pedonale. Su nùmene de s’eventu, Note sotto la Torre-Pasquetta in musica per l’Asinara, narat cale est s’obietivu: fàghere a connòschere e valorizare su patrimòniu naturale e culturale de su logu. Ant a èssere presentes, pròpiu acanta de sa turre, operadores de su Parcu.
Semper in ie est in programma una mustra estemporànea de pintura dedicada a s’ìsula, organizada dae sa TNT Global Art.
In prus sa gente at a pòdere bìdere sas istallatzione artìsticas de sa dita Arcobaleno e sas immàgines e filmados de Daniele Amato de Isola Mea. No ant a mancare sas bancarellas e finas una mustra de su Vespa Club Porto Torres.
Sas esibitziones musicales sunt previstas a su sero. A sas chimbe ant a sonare sos Tazenda; a sas ses e mesu sos Rezophonic, su progetu de Mario Riso, cun esponentes de diferentes grupos, che a Lacuna Coil, Timoria, Prozac +, Punkreas, Bluvertigo e Modena City Ramblers; a sas otto e mesu, in fines, ispàtziu a Dj Toky, de Virgin Radio.
Pro su chi pertocat S’Alighera imbetzes, a sas ses de sero, in pratza Pino Piras, ant a sonare sos Collage. Su grupu, nàschidu in Terranoa in su 1971 e autore de èsitos che a Tu mi rubi l’anima, Due ragazzi nel sole e Donna musica, s’at a esibire cun sa formatzione atuale, formada dae Tore Fazzi, boghe e bassu, Uccio Soro, chiterra, Fabio Nicosia, tastieras e Francesco Astara, bateria.
A abèrrere s’ispetàculu ddo’ant a èssere Alverio Cau e Giampaolo Barceloneta.
(gianni muroni)
Leave a comment