Foto leada dae livgolf.com
S’atacu israeloamericanu a s’Iran at cajonadu unu terremotu polìticu in sos paisos de su golfu aràbicu. S’istadu chi prus at patidu dae sa gherra est s’Aràbia Saudita, alleadu istòricu de sos Istados Unidos e de Israele.
A pustis de sos contratacos iranianos a sas bases militares americanas e a sas infrastruturas issoro sos istados de sa penìsula aràbica si sunt bidos sena de difesa e sa chi pariat una garantzia, est a nàrrere sa presèntzia de sordados de Washingtons, s’est rivelada imbetzes una debilesa.
Sos àrabos ant bidus ca sos americanos, non de non renèssere a ddos difèndere, ddos ant espostos a sa ritorsiones de Teheran.
A custu cheret agiunta sa decraratzione pùblica de Trump chi a fine de martzu at naradu, cun paràulas malas, ca Mohamed Bin Salman, primu ministru e èrede a su tronu saudita, si fiat umiliadu in dae in antis suo.
Sos sauditas dae issara ant annuntziadu una ritirada dae s’ispòrt otzidentale de su fundu soberanu issoro, su P.I.F. (Private Investment Fund). Pro cumintzare su fundu at tzèdidu una de sa bator iscuadras suas de fùbalu de su campionadu locale, s’Al Hilal. A coa, chida passada, est arribada sa detzisione ufitziale de non finantziare prus su tzircùitu de golf internatzionale LIV. Sa tapa chi benit de su tzircùitu at a èssere pròpiu in su Trump National Golf Club de Washington, de propiedade de su presidente americanu.
Creadu in su 2022 pro fàghere cuncurrèntzia a su PGA (Professional Golfers’ Association), fundadu in su 1972, su LIV est costadu finas a como chimbe milliardos de èuros. Dae ocannu chi benit custu dinari at a mancare, cosa chi est fàtzile chi càuset sa fine sua.
A tìmere como sunt sos tifosos de su Newcastle United F.C., a oe in sa de trèighi positzione in su campionadu inglesu, chi s’85% est propiedade de su P.I.F. Sos sauditas ant giai annuntziadu ca pro ocannu s’iscuadra s’at a dèpere autofinantziare cun sa tzessiones.
Sa fine de custos investimentos marcant una crisi in sos raportos cun su mundu oztidentale, chi oe 7 de maju at tentu aterunu impeoramentu. Rihad at blocadu de facto su pianu de Trump mutidu Project Freedom pro iscortare sas naves cummertziales in s’Istrintu de Hormuz: s’Aràbia Saudita at negadu s’usu de sas baese americanas.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment