Su Poetry Slam est una gara poètica. Ma non giuat a la mutire de custa manera, a su nessi in Sardigna. Inoghe sa gara est un’àtera cosa e l’ischimus. Unu disafiu, tando? Emmo. Ma a dae chi est unu fenòmenu chi naschet in Chicago prus de 30 annos a como, forsis diat èssere mègius a lassare su nùmene suo gasi comente nois sardos non cherimus a traduire a sa grussera tèrmines de cosas nostras. Nâdu custu, su Poetry Slam naschet pro nche torrare sa poesia de chie si siat in mesu a sa gente, cun giuria populare chi vàlutat paràulas e interpretatzione e cun àteros pagos inditos: cumponimentos chi non siant iscritos dae àtere e tres minutos de tempus a disponimentu. Una dimensione orizontale in ue, si narat, «binchet sa poesia». Custu sero, in Nùgoro (a sas 18 in su tzìrculu “Sa Bena” de carrera de Santu Martine), bi nd’at unu dedicadu a Ànghelu Caria, patriota e poeta istimadu comente polìticu e comente òmine.
Màuru Piredda
REGULAMENTU
1. Sa gara de su “Prèmiu Ànghelu Caria” sighit sas règulas de su Poetry slam: tres minutos peròmine a disponimentu; cumponimentos lèghidos o resados sena vìnculos mètricos ma chi non siant de àtere; ausèntzia de mùsica e de efetos iscènicos.
2. Cale si siat limba; poesia cunforme a su tema inditadu: “Poetry Slam a tema internatzionale supra de sos populos opressos e de s’isfrutamentu ”; poesia ebbia e non monòlogos o contos.
3. S’intèrprete chi leghet o resat unu cumponimentu in limbas diferentes dae sas faeddadas comunes (sardu e italianu) podet presentare, in foras de sos tres minutos (e duncas cun àteru tempus a disponimentu), sa versione in sardu o in italianu.
4. Cunforma a sa prassi reconnota de su Poetry slam, sa giuria l’amus a sorteare in antis chi comintzet sa gara. Chie si siat podet fàghere su giuradu, francu sos chi tenent raportos de parentela, afetivos o econòmicos cun unu o prus intèrpretes. Sos giurados s’ant a espressare marchende unu votu intre su 0 e su 10 valutende testu e interpretatzione.
5. Sa gara tenet duas fases: una eliminatòria in ue b’ant a pigare parte totu sos poetas marcados; una finale, cun sos bator intèrpretes chi ant otènnidu su puntègiu prus artu. Pro custu motivu est pretzisu a si pigare in fatu duas poesias peròmine, inèditas o mancu bastis chi cunformes a su tema.
6. Sas iscritziones potent cròmpere finas a su die, telefonende o imbiende unu sms a su 32759159 (ma finas iscriende in privadu a Tramas de libertade o cummentende inoghe). Inditamus unu nùmeru màssimu de 10 poetas. Custu cheret nàrrere chi in antis de s’iscadèntzia amus a pigare in cunsideru s’òrdine cronològicu; e s’in casu sas iscritziones diant dèvere èssere inferiores a su nùmeru inditadu, lassamus aberta sa possibilidade de si pòdere marcare in loco.
7. Sa premiatzione pro sos primos tres classificados a concruos de sa gara.
9. Sa gara a boghe arta “Prèmiu Ànghelu Caria” est unu Poetry slam che a sos àteros ma indipendente.
10. Sa gara a boghe arta “Prèmiu Ànghelu Caria” est unu cuncursu literàriu che a sos àteros. S’ùnica diferèntzia pertocat su mètodu de valutatzione dende importu a sa boghe de sos poetas e dende responsabilidade de giudìtziu a sa giuria populare.
Organizant sa famìlia, su tzirculu “Sa Bena” e sos amigos de Ànghelu.
Leave a comment