Perda Sonadora in chirca de poetas noos

Perda Sonadora in chirca de poetas noos

Comente si podet annoare sa poesia in sardu? Paret custa sa pregunta chi si nche est fatende s’assòtziu culturale Perda Sonadora de Sèneghe, su chi ammanìgiat su Cabudanne de sos Poetas. Una dimanda chi chircat risposta cun unu cuncursu de poesia inghitzadu a martzu e chi abarrat abertu fintzas a s’agabbu de austu (inoghe su bandu).

Sas limbas acollidas sunt totus cussas chi si faeddant in Sardigna (sardu, tataresu, gadduresu, tabarchinu e aligheresu), francu s’italianu chi b’at a èssere petzi in sas tradutziones. Sa punna est de agatare boghes noas de poetas noos pro las mìntere in sa collana de sa domo de imprenta de s’assòtziu, chi at publicadu giai iscritores de gabbale. Difatis sos poetas non depent àere publicadu libru de poesia perunu e su chi est pedidu no est un’o duas poesias ebbia, ma una regorta intrea.

Chie at a isseberare sos tres finalistas ant a èssere Mario Cubeddu, Maurizio Virdis, Luca Manunza, Simone Cireddu, Simonetta Milia. Unu traballu chi at a durare fintzas a s’istiu de s’annu imbeniente, cando amus a iscobèrrere cale àndalas noas est sighende sa poesia sarda.

Gabriele Tanda

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *