Su babbai mannu de sa limba sarda Pàulu Pillonca contras a s’Universidade de Tàtari. In s’ùrtimu nùmeru essidu in edìcula de sarevista de s’identidade, s’iscritore osilesu si la leat cun sos acadèmicos pro sas ùrtimas positziones leadas in sa cuntierra contra a s’ufìtziu regionale de sa limba sarda. Lu faghet a manera sua, mesu in suspu e mesu nono, sena fàghere mancu unu nùmene o paranùmene, ma imbiende puntas de billete craras a s’indiritzu de Attilio Mastino, retore de s’ateneu tataresu, e de sos professores prus arrenegosos de sa commissione antilimba Dino Manca, Giovanni Lupinu, Carlo Schirru e Aldo Maria Morace.
Universidade: fiagu de presumu
<Sa limba sarda no est aggradéssida meda in s’Universidade. E si est beru chi in custos ùltimos meses Casteddu at dadu signales de amistade, Tàtari sighit muntènnere una braga fora de medida. Limbistas e istudiosos de istòria faghen bessidas chene perunu seru: bi nd’at chi cantan sa cantone bedusta segundu sa cale su sardu non tenet una sienda bastante de peràulas pro narrer totu, bi nd’at chi sun galu suta s’ammuntu de sentidos de birgonza, che cando su sardu siat una camija istratzulada adata a su sartu, ma no a passizare in bidda. E bi nd’at puru chi naran àteros solorios. Subra unu de custos diat èsser de ispaju a lezer su chi ant iscritu sos esaminadores de latinu – limba de importu màssimu pro nàrrere calchi cosa justa subra su sardu – in su cuncursu pro èssere titulares. De aterunu an iscobertu copiaduras a trumas. Ma su presumu insoro sighit a esser illacanadu.
De totu custos non bi nd’at unu chi su sardu lu faeddet a deghile: in parte manna non lu faeddan nudda, in parte minore tentan de lu faeddare a bìculos e cantigheddos fatende a rier sa zente. Ma custos nari-fines an retzidu e retzin dae sa Regione dinaris a muntone, los an ispesos e los ispenden chene nàrrer mai comente ne proite. Subra custu mistériu s’est ischidu ebbia chi s’Universidade tataresa, dae su 2002 a su 2007, at impitadu sos finantziamentos destinados a sa limba sarda (in ses annos, 3 milliones de èuros) pro fagher cursos in italianu subra temas che i custos: storia della filosofia morale in Sardegna, ecologia vegetale della Sardegna, ecologia e zootecnia della Sardegna, flora
medicinale regionale.
In pagas peràulas, bator cursos de materias limbisticas, batordighi chi cun su sardu b’intran che caule a ismurzu. Su sardu comente limba de imparu no est istadu impitadu mai. Dae como in susu sa Regione – l’at nadu s’assessore de sa Cultura Sergio Milia – at a chèrrere ischire totu. A primore>.
Pensamus chi Mastino apat cumpresu bene su chi cheret nàrrere custu artìculu. E finas Blasco.
Leave a comment