de Angelo Canu
Pasada e sa Baronia annoant sa traditzione de su sardu “limba literària”. Su 25 de cabudanni, a sas 6 de borta de die, in sa Domo de sas Damas, su sìndigu Roberto Tola e Diegu Corraine, presidente de sa Sotziedade Culturale Casteddu de sa Fae, ant a presentare su BANDU 2015 de su PRÈMIU “CASTEDDU DE SA FAE”.
Su Prèmiu, fundadu in su 1984 dae Màuru Deledda, est su prèmiu literàriu sardu prus de importu de totu sa Sardigna: bastat a nàrrere chi in sas àteras editziones intre sos binchidores bi sunt istados Mialinu Pira, Benvenutu Lobina, Larentu Pusceddu, Giuseppe Tirotto, Palmiro de Giovanni, Giancarlo Tusceri e àteros meda.
S’editzione 2015 at a mustrare novidades mannas: una cumpositzione noa de sa giuria, a su gemellàgiu cun àteros prèmios literàrios in àteras limbas natzionales, una norma iscrita racumandada unu cuntributu in dinare a sos editores chi ant a publicare s’òpera premiada in àteras limbas.
Unu prèmiu literàriu chi ponet ligòngios intre su connotu e su tempus benidore e chi punnat a mustrare su sardu in totu sa fortza espressiva sua.
Sa Sotziedade dat a ischire chi semper su 25 de cabudanni, paris cun sa presentada de su bandu, “b’at a èssere un’ AMMENTU de s’iscritore e giornalista Giuanne Frantziscu Pintore (mortu su 24-9-2012) chi est istadu Binchidore in su 1988, cun su libru SU ZOGU, in su Prèmiu Casteddu de sa Fae”, ma fintzas chi “sa presentada cumbinat cun sa ‘Die europea de sas Limbas’, istituida dae su Cussìgiu de Europa, chi ruet cada annu su 26 de cabudanni.”
Difatis in s’addòbiu ant a faeddare amigos e connoschentes de GF Pintore e amigos de su PRÈMIU CASTEDDU DE SA FAE, chi ant a chèrrere propònnere sa testimonia issoro.
Una die pro sa limba sarda, de ammentu e de ordimìngiu pro su tempus benidore.
Leave a comment