de Martine Faedda
Est essida custas dies sa noa chi sa Corte Costitutzionale at respintu s’emendamentu propostu dae assòtzios e polìticos sardos, pro otènnere prus pesu eletorale pro sa Sardigna e pro dda pònnere a su matessi livellu de àteras minorias linguìsticas presentes intro a s’Istadu Italianu, mègius tuteladas.
Proposta nòbile a beru ma, comente semper at naradu su Coordinamentu pro su Sardu Ufitziale, male posta e ordimingiada sena critèrios sèrios chi ant iscobertu s’ala dèbile de totu sa polìtica linguìstica de custos ùrtimos duos annos.
Difatis, comente giai amus naradu “su sardu non tenet galu peruna tutela in custu livellu giurìdicu, a bètia de sas signalatziones e rechestas chi faghent dae annos sos responsàbiles de su Coordinamentu a su Cussìgiu Regionale e a sos deputados e senadores sardos”.
A bortas si serrat una gianna e s’aberit unu portale mannu. Custa sentèntzia at fatu cumprendere a medas chi su sardu sena Istandard, sena Limba Cobertura, sena Limba Sarda Comuna, no est unu sugetu giurìdicu sèriu.
Luego in sa retza est inghitzada totu una resonada a pitzu de custu e, si in medas ant postu fatu s’idea e dadu contu a sa letura nostra, àteros ant sighidu a nàrrere chi “nono, no est gasi comente narat su CSU!”, “Fàula”, “pseudo-giuristas!”, e gasi sighende.
Ma sa cosa bella, chi devet fàghere meledare meda meda chie, cada die, sighit sas peleas de sa limba nostra est a bìdere comente ant atuadu sa chistione diversos polìticos sètzidos in sas cadiras de su Palatzu Regionale.
Gianfranco Ganau, su Presidente de su Consìgiu Regionale narat, “a chiare lettere” chi, sighende sos inditos de sa Corte Costitutzionale est ora de pònnere su sardu intro a s’Istatutu Sardu e adotare una limba sarda unitària nessi pro s’iscritu. Forsis su presidente Ganau gràtzias a carchi temporada de “Paulina” memòria at cumpresu cale est su valore, finas polìticu e econòmicu, de su sardu.
Franciscu Sedda, segretàriu natzionale de su Partidu de sos Sardos, a segus de sa sentèntzia narat “Est tempus de agiùnghere una limba. Natzionale”. “La Corte Costituzionale”, narat issu, “infatti ha ribadito due principi: 1. la lingua sarda deve entrare nello Statuto; 2. la lingua sarda deve avere una forma unificata.”. Ma narat fintzas: “Chiunque ami il sardo, ora più che mai dovrebbe convincersi che bisogna fare tutti un passo oltre campanilismi e localismi “.
Est a nàrrere su chi naramus nois dae … semper.
Como, a su ischimus, Ganau e Sedda non sunt militantes de su CSU. A dolu mannu non tenimus su podere de pònnere in buca a nemos sas ideas nostras, mancari nos diat praghere. Su chi ant iscritu e naradu est su chi ant cumpresu a solu cun sa conca issoro e, càstia tue, est su pròpriu chi amus cumpresu nois.
A segus de pagu tempus est essidu su comunicadu de Pàulu Zedda, rapresentante de su partidu de is “Rosso Mori” in Consìgiu Regionale chi, arrennegadu (e si cumprendet) pro sas concrusiones de sa Corte Costitutzionale si dda pigat cun chie at cumpresu sa chistione a manera diversa meda de sa sua. In su testu nos ammentat chi est issu unu de is firmatàrios de su ricursu ma non li nch’est calada chi in medas ant tentu una bisione diversa meda de sa sua: “intervengo anche per contribuire, nel mio piccolo, a fare chiarezza in riferimento ad alcune letture decisamente surreali che si son date del dispositivo della Corte.” E sighit: “Nessuna sentenza tombale (custu ddu naramus nois puru), dunque, e soprattutto, nessuna avveniristica presa di posizione della Corte in merito alle condizioni del processo di standardizzazione del Sardo, che semmai sarebbero oggetto di valutazioni politiche o, peggio, sul modello di standardizzazione prescelto(?!) come preteso da alcuni aspiranti giuristi.”
Como, a intendere tzertos nàrrere chi semus in malafide, chi contamus fàulas e àteras bellas paràulas, semus abituados. Ma a mentovare su Presidente Ganau e a su segretàriu de unu partidu “amigu” in Consìgiu Regionale “aspirante giurista” faghet meledare e meda puru.
A banda su chi pensamus nois e àteros, cherimus preguntare a Paulu Zedda e finas a totus sos onorèvoles sètzidos in su palatzu in via Roma, ite bolent fàghere pro su sardu. Bolent sighire cun sa polìtica perdente de “sas variantes” o inghitzare a traballare pro unu sardu ufitziale forte cara a su mundu?
Leave a comment
Sas variantes sono unu iscusorju limbisticu chi non cheret lassatu perdere..ma sos sardos tenen bisonzu de una limba uffitziale. …bi cheret pacu a lu cumprendere….est a non timere a lu narrer ….
Sughimus sa cumbata. Sa limba sarda comuna est leze regionale a dispetu de chie in regione nos aministrat e mancu nd ischit. Antoni frau