Otieri, inferru de abba e gràndine

OTIERI. In beranu fatu est arribada de repente una die de ierru e traschia mala. Eris, a inghìriu de sas ses de sero, una “bomba de abba” acumpangiada dae una grandinada mai bida a primu, s’est isgarrigada subra de Otieri, blochende totu su tzentru abitatadu e sas làcanas a inghìriu. Sa chi a su comintzu pariat una temporada che a medas àteras, a mèrie s’est fata prus forte e prus fea. In mes’ora ebbia, in su Logudoro sunt rutos de prus de 44 mm de abba, una cantidade chi sos canales de sa tzitade no sunt renèssidos a sustènnere.

Sas carrelas si sunt mudadas in rios trasinende granos prus mannos de duos tzentìmetros. Sa forma de su terrinu de Otieri, totu a su piga e fala, at atzeleradu sa fua de abba, ghiaciu e ludu a cara a sos giassos bassos de sa tzitade. Su tràficu s’est arressu de su totu. Automobilistas medas sunt abbarrados intro de sas veturas issoro, chentza possibilidade de si mòvere pro more de sa manta grussa de ghiàciu (paritzos tzentìmetros in maigantos logos) e de s’abba chi intraiat dae foras.

Non sunt mancados sos allagamentos in zonas diferentes, in su bighinadu de Santu Baìngiu e carrela Umberto, ue unas cantas domos ant sufridu dannos graes. In carrela De Gasperi e in sa Gescal, sa fortza de s’abba est renèssida a intrare in sas domos fintzas peri sas giannas e sas ventanas serradas. Àteros bighinados de sa tzitade sunt abbarrados a s’iscuru pro curpa de guastos elètricos causados dae sos rajos e dae sos dannos de sas lìnias.

Sas iscuadras de sa Protetzione Tzivile e de sos Vigiles de su Fogu sunt intervènnidas deretas pro liberare sos tumbinos tupados e agiudare sos tzitadinos a bogare s’àbba dae sas chentinas. Fintzas su mundu de s’isport at sufridu blocos fortzados: su Tennis Club, in sa zona de Puppurujiu, at dèpidu firmare sas partidas de su torneu ca sos campos non si podiant praticare.

Bobore Taras