Non nche acabbant mai sas peleas pro sa sanidade nugoresa, prus a notu pro s’ospidale Santu Frantziscu de Nùgoro, una istrutura in dificultade pro neghe de sa mancàntzia crònica de personale, chi però est netzessària pro garantire sos livellos essentziales de assistèntzia a sos tzitadinos de totu sa Sardigna de mesu.
A pustis de sos espostos presentados a sa Procura de sa Repùblica dae sos assòtzios de sos malàidos e de sos trapiantados e dae su movimentu polìticu Progetto per Nuoro, est de oe sa noa chi 117 dotores in servìtziu in s’ospidale nugoresu ant denuntziadu a sos magistrados de su Palatzu de Giustìtzia sas conditziones crìticas in sas cales sunt custrintos a operare.
Cumintzende dae sa mancàntzia de personale chi at custrintu sa ASL a pònnere paris unos cantos repartos e a nde tancare àteros, che a chirurgia, ortopedia-traumatologia e urologia.
Sos dotores in su documentu iscrient chi in s’ospidale Santu Frantziscu non sunt prus garantidos sos livellos essentziales de assistèntzia e duncas si podent reconnòschere perfilos de illegalidade.
S’espostu l’ant imbiadu peri a su Presidente de sa Regione Christian Solinas e a s’assessore de sa sanidade Mario Nieddu, a su Prefeto Luca Rotondi, a su sìndigu de Nùgoro Andrea Soddu, a s’Ispetoradu de su traballu e a sas autoridades sanitàrias.
Su 15 de trìulas, a s’ospidale de Nùgoro, fiat arribada una bìsita ispetiva promovida dae sa deputada Mara Lapia, afiancada dae sos Carabineris de su NAS, pro averiguare sos càrrigos de traballu de su personale e bìdere sa situatzione de sos patzientes e de sos utentes de su Pronto Sucursu.
S’espostu de sos dotores de su Santu Frantziscu arribat a pustis chi, in sas dies coladas, su Diretore generale de sa ASL, Paolo Cannas, aiat dau a ischire chi dae cabudanni unos cantos repartos torraiant a abèrrere, isorvende unas cantas dificultades.
Mariantonietta Piga