Pagas dies a oe artesanos sardos de gabbale ant distruidu pro protesta sas òperas issoro. Sa resone est chi sa Regione non at dadu galu sos indennizos chi li pertocant. Su Covid at menguadu sos balàngios e in prus sas fieras e sas àteras manifestatziones non si nche sunt fatas. Eventos chi a sos artesanos ant semper dadu possibilidades meda de bèndere sos traballos issoro. Su perìgulu est chi tanchent butegas de importu e chi si potzat ispèrdere un’erèntzia manna de cultura e de traditzione. Non est noa sa dificultade de su setore (nde amus faeddadu inoghe), ma est noa sa manera de protesta chi si nche est ispartzinada in sa retza pro more de su vìdeu inoghe in bàsciu.
Sa protesta de custu setore benit posca chi in Regione est colada sa lege pro ismanniare s’iscuadra de sa Giunta e pagu in dae in antis chi sa lege pro sas provìntzias noas est istada refudada dae su guvernu. Totus leges chi non punnant a amparare su pòpulu sardu, ma a illargare su poderiu de pagos. Cand’est chi sa Giunta s’at a ischidare e at a incumintzare a amparare sos sardos?
(redatzione)
Leave a comment