Su presidente de s’assòtziu Sardegna verso l’Unesco Michele Cossa at presentadu eris 12 de ghennàrgiu in Casteddu s’initziativa pro fàghere reconnòschere dae s’agentzia de s’ONU sos nuraghes comente patrimòniu de s’umanidade.
Sas duas universidades sardas si sunt espressadas in favore e ant garantidu chi s’ant a pònnere a dispositzione. Segundu Cossa su reconnoschimentu at a pòdere agiuare a gherrare contra a s’ispopulamentu e a s’isulamentu de sas biddas piticas, a prus de tutelare s’identidade sarda.
Pro custu s’agiudu de su mundu acadèmicu est importante, bidu chi unu de sos obietivos est una sinergia intre universidade, Regione e Ministèriu.
A custu cheret agiunta sa possibilidade de bogare traballu cumintzende dae sos laureados ispetzializados in matèria.
In Sardigna ddo’at prus de oto mìgia nuraghes, carchi tres mìgia chimbighentas domos de janas e unos milli intre dolmen e menhir.
S’Unesco at a detzìdere su 31 de martzu.
(redatzione)
Leave a comment