Sunt partitos in manera ufitziale sos traballos in s’ala ovest de su Nuraghe Miuddu (Bìrori), unu logu de importu mannu in ue sa comunidade sientìfica pensat chi si potzat agatare s’intrada printzipale de su fràigu antigu. Custa operatzione est s’ùrtima parte de unu progetu incomintzadu su 25 de freàrgiu coladu, pro pònnere in seguresa sos muros e compudare su terrinu. Unu prògetu chi est torrende a su territòriu una testimonia de interessu ispantosu.
Sas primas chircas ant giai cunfirmadu sa mannària architetònica de su giassu: est unu nuraghe cumplessu, formadu dae una turre tzentrale arta meda e protègida dae tres turres minores. Mancari sos traballos siant galu in pee, s’operatzione de pulidura dae sa tupas, in sos lados nord e est, at permìtidu de nde bogare a pìgiu sas muràllias, faghende a bìdere unu fràigu antigu chi at bintu sos sèculos.
Sas isfossaduras printzipales pro como sunt istadas fatas mescamente in su costàgiu orientale. Dae inoghe sunt istados bogados sos crastos rutos, e s’est pòtida lèghere de manera crara sa lìnia de su chi sos espertos cramant antemurale. Su traballu, coordinadu dae sa Responsàbile ùnica de progetu Patrizia Luciana Tommassetti, at a sighire pro sos duos meses chi benint, rispetende sos tempos netzessàrios pro s’istùdiu sientìficu de sos repertos e de sas istratigrafias.
Suta a sa diretzione sientìfica de Gianluigi Marras e sa diretzione de sos traballos afidada a Gabriele Manca e Donatella De Rinaldis, su cantieri bìdet in prima lìnia sos archeòlogos Laura Lai e Gerolamo Barra cun s’agiudu operativu de s’impresa Luciano Sini. Sa punna est crara: no est a pònere ebbia in seguresa su monumentu, ma a bogare dae sa terra sos segretos de unu giassu — su de s’ala ovest — chi diat pòdere iscrìere de nou sa istòria de custu logu. S’ispera de agatare s’intrada monumentale est ponende in tribulia sos espertos, prontos a torrare a sa comunidade una fache de importu de su nuraghe.
Bobore Taras
(Foto sabapca.cultura.gov.it)
_____________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment