Ite nd’at essidu a campu dae sa Cop 28 in Dubai? Chi, pro menguare sas emissiones de gas serra, bintiduos paisos ant aderidu a sa Declaration to Triple Nuclear Energy, un’acòrdiu pro triplicare sa capatzidade issoro de produire energia nucleare intro de su 2050.
Bulgaria, Cànada, Corea de su sud, Emirados àrabos unidos, Finlàndia, Frantza, Ghana, Giapone, Islovàchia, Islovènia, Istados unidos de Amèrica, Isvètzia, Marocu, Moldàvia, Mongòlia, Paisos bassos, Polònia, Rennu unidu, Repùblica tzeca, Romania, Ucraina e Ungheria si sunt duncas impignende a «mègiorare» sas tzentales nucleares chi tenent e a investire pro chi si nde fràighent àteras. A bisu issoro s’energia nucleare est sa manera sa prus lestra pro sessare s’isfrutamentu e s’impreu de combustìbiles fòssiles e pro fatzilitare sa transitzione energètica.
E àteru b’at, ca s’aumentu de sa produtzione de energia pro mèdiu de tzentrales nucleares diat dèvere illiberare s’Europa dae sa dipendèntzia dae gas e petròliu russu. Unu sèberu fintzas polìticu, duncas.
Ma b’at unu ma, antzis, duos: sos tempos e sos costos. E pro custu est chi unos cantos leader europeos comente Macron e àteros ant naradu chi bi diat dèvere intervènnere sa Banca mundiale e àteras istitutziones finantziàrias. S’Itàlia no at aderidu, fintzas ca cussu paisu non nde produit, ma sos guvernantes non sunt contràrios, annanghende chi s’iscummissa est sa de sa fusione pro non produire resùgios.
Sa nova de Dubai no est noa-noa, custu su chi b’at àpidu peri su mundu sas chidas coladas: in Cànada su parlamentu at reconnotu comente “green” sos tìtulos emìtidos dae sas aziendas nucleares de su paisu; in Isvètzia su guvernu est punnende a duos reatores noos de grandu mannària intro de su 2035 e una potèntzia installada ecuivalente a 10 reatores de grandu mannària intro de su 2045; s’europarlamentu at emendadu su Net-zero Industry Act ponende·nche in mesu totu sas tecnologias nucleares; in Illinois, s’istadu prus birde de sos Usa, ant abolidu sa moratòria pro su fràigu de tzentrales noas.
màuru piredda
Leave a comment