Novas in sas indàgines pro sa morte de Antonio Masia, s’operaju de 53 annos de Tàtari, agatadu mortu, su 25 de trìulas, in sos locales de s’istabilimentu Gesam de Tàtari, in localidade Truncu Reale. Sa Procura de sa Repùblica de Tàtari at iscritu una pessone in su registru de sos indagados.
Sa notomia, disposta dae sa Procura, at averiguadu chi s’òmine non est mortu de repente, comente pariat in unu primu momentu. Pro sos agentes de s’Iscuadra Mòbile de Tàtari, pustis mortu a Masia l’ant cuadu e l’ant agatadu, una paja de oras a pustis, sos collegas, mutidos dae sa mugere, in oriolu ca fiat galu a recuire a dommo.
Su 6 de austu, a mangianu, sos investigadores de sa Mòbile ant fatu unu subra-logu in s’istabilimentu Gesam, secuestrende·nche sos telefoneddos de sos dipendentes in servìtziu sa die de sa morte de Masia. A bortadedie unu fogu, abarradu allutu pro 3 dies, at brusiadu s’impiantu pro su tratamentu de s’arga. Sos pompieris de su Cumandu Provintziale de Tàtari ant sincheradu chi est istadu postu a posta. Sos Carabineris de su Nùcleu operativu ecologicu sunt indaghende pro cumprèndere si b’at carchi ligàmene intre sa morte de Masia e su focu in s’impiantu.
Mariantonietta Piga