Nostra Sennora de sa cincirriola, iscontza s’àrbore e torra a iscola. In custu comintzu de su 2022 dìamus pòdere agiornare su ditzu de su 2 de freàrgiu pro duos motivos: non ca est torrende ebbia a girare sa noa in contu de àrbore de nadale e de data de iscontzu sua, ma finamentas ca b’at paritzos prèsides chi diant chèrrere a lassare sos pitzinnos in domo pro totu su mese de ghennàrgiu pro more de s’ispaniada de s’omicron.
1) Ma tando, s’àrbore de nadale, cando est chi cheret iscontza? E gasi etotu su presèpiu? B’at chie, finamentas ocannu, narat chi s’operatzione cheret fata su 2 de freàrgiu ca est tando chi – nânt chi – si serrat su perìodu natalìtziu. Ca sa die de sa “candelora” si beneighent sas candelas, sìmbulu de Cristos chi baranta dies a pustis de sa nàschida lu presenteint a su tèmpiu. E baranta fiant sas dies pro chi Nostra Sennora (che a cada fèmina dende lughe a fìgios mascros) si purificaret. Una ispètzia de barantinu, de “quarantena”, pro nàrrere.
2) Como, pro chi sa pitzinnalla si purìfichet dae s’omicron (o pro chi non sa la pighet in sos bancos giughende·nche·la a pustis dae cue a domo), cheret chi si nch’abarret in Dad. Cheret chi si presentet a su tèmpiu iscolàsticu una bia colada sa traschia. Pro cussu sos prèsides, a su nessi paritzos intre issos, ant propostu a su ministru Bianchi de traballare/istudiare a distàntzia pro totu su mese de ghennàrgiu. Ma pro su Guvernu est bastante unu screening.
Nema problema. Faghet totu s’abitùdine: s’abitùdine de iscontzare s’àrbure colados sos tres rees o sa befana chi siat (semper chi calicunu non nche l’apartet in unu cugione de sostre o de chentina lassada gasi comente est); s’abitùdine de paritzos pitzinnos e de paritzos babbos a cuntzepire sa tecnologia petzi che a una social-cloaca; s’abitùdine de su bonu de nois a cuntzepire sos traballadores de s’iscola che a mandronatzos garantidos; s’abitùdine de sos guvernantes a discuidare s’iscola che chi esseret s’ùrtimu de sos pensamentos issoro.
Ite nos abarrat? Su de iscumproare si su duos faghet fritu o grangiola.
màuru piredda
Leave a comment