de Giagu Ledda
Eris Anthony Muroni, in unu post suo, invitende a chi no lu votent, sos ratzistas, sos trasseris e sos chi si cherent aprofetare, finit iscriende custu:
– Chie cheret dae mene un’impignu pro chi unu cras bi siant duas diversas limbas sardas ufitziales iscritas (e custu non significat chi sa LSC siat immutàbile o non discutìbile) est invitadu a NON mi votare.
Deo so de acordu cun s’invitu chi faghet Anthony Muroni, chi m’at dadu s’ocasione de andare a bìdere, e tradùere in sardu, custa genia de decàlogu vàlidu pro totu sas limbas, iscritu dae su babbu mannu de sa limba catalana, Pompeu Fabra.
– Sa limba est sa natzione, de sa matessi manera chi sa natzione est sa limba.
– Ogni limba aunit sos faeddantes suos, diferentziende·los dae sos chi nde faeddant un’àtera.
– Mantènnere bene separadas duas limbas est a mantènnere bene diferentziadas duas comunidades, cosa chi cumbenit in modu particulare a sa prus dèbile cando bi sunt diferèntzias craras de poderiu.
– Sa fortza de una limba non si fundamentat in nudda ogetivàbile de su sistema suo internu ne in peruna determinatzione metafìsica, ma in sa fortza econòmica, sotziale, polìtica e culturale de su grupu a ue apartenet.
– Sos istados plurilìngue tentant su monolinguismu a favore de sa limba chi los distinghet, pro evitare sa pèrdida de su poderiu issoro.
– Recuperare su catalanu* est una faina ligada diretamente cun su recùperu natzionale.
– S’unidade linguìstica currispondet cun s’unidade natzionale. Sa frammentatzione linguìstica est su riflessu de sa decadèntzia de unu pòpulu.
– Su rispetu a s’unidade e, duncas, sa disciplina linguìstica, prus chi non una atitùdine literària est una atitùdine patriòtica.
– Sas diferèntzias chi separant duos dialetos podent fintzas separare duas comunidades, non ca custas diferèntzias siant meda o pagu significativas, ma ca prevalet sa voluntade de una de sas partes de si segregare, siat comente colletivu diferentziadu, siat comente subalternu de su chi rapresentat s’istadu.
* pro a nois su sardu
Penso chi custa diat pòdere èssere sa ghia maistra pro una polìtica linguìstica in Sardigna.
Leave a comment