Mùsica noa dae sa bèrtula de Adrià Mor, su cantautore catalanu innamoradu de sa Sardigna e de sa limba sua. A pustis de l’àere intesu dae pagu – in ocasione de sa Die de Sardigna – cun una cover de Woody Guthrie, acò chi como nos at intregadu una cantzone sua, su primu sìngulu dae su discu imbeniente suo, De Sardenya a Califòrnia.
Sa cantzone “Non bido s’ora” est presente in su situ suo www.adriamusic.cat chi l’acollit in su formadu videoclip registradu in Califòrnia in pare cun s’atora sarda Franca Bulloni, e est dedicadu a sa gente chi «bivet a tesu de Sardigna e non bidet s’ora de torrare». In sa parte àudio sa collaboratzione est imbetzes cun sa cantautora burteina Elisa Carta (chi tres annos a como aiat publicadu su discu suo “S’Incontru”, belle totu cantu in sardu).
De custa manera su sardu meridionale cantadu dae Mor si aunit a su sardu tzentrale chi essit dae sa boghe de Carta. Sas collaboratziones rapresentant una caraterìstica de sas produtziones de su cantautore catalanu. “Terras de abbundu”, sa cover de Guthrie a comintzu mentovada, pro nàrrere, est cantada in pare cun Matteo Leone, Davide Casu e Federico Marras Perantoni impreende sas limbas de Sardigna: sardu, tabarchinu, aligheresu e turritanu.
Pro su discu imbeniente sa prassi est rispetada. «Custu single – narat Adrià Mor – est sa prima cantzone fata pùblica de su discu De Sardenya a Califòrnia, traballu chi est istadu possìbile gràtzias a meda collaboratziones. A bandas de cussa giai mentovada de Elisa Carta, su discu tenet is boghes de Eleonora Peana (L’Alguer), Meritxell Gené (Lleida) e su Coro de Ùsini, in prus de is teclados de Antonio Leardi (Train to Roots) e is violinos de s’aligheresu Dario Pinna, intre àteros». E fintzas sas sonoridades collaborant: «De Sardenya a Califòrnia isperimentat puru cun is sonos de sa traditzione sarda, comente is launeddas de Gratzianu Montisci». S’anteprima de su discu podet èssere ascurtada dae su situ web de s’artista www.adriamusic.cat.
Gianfranca Orunesu
Leave a comment