Nicolino Locche, sardu de Argentina

Nicolino Locche, sardu de Argentina

Su 7 de cabudanni de su 2005 moriat de infartu in Las Heras, in sa Provìntzia de Mendoza, Argentina, Nicolino Locche, unu de sos mègius pùgiles in s’istòria de su paisu sudamericanu.

Teniat sessantasès annos. Fiat fìgiu de immigrados sardos, de Biddexidru e fiat nàschidu in su 1939 in Tunuyán, in sa matessi provìntzia.

Aiat cumintzadu a pitzinnu s’atividade pugilìstica, colletzionende 122 giogos intre sos diletantes, perdende·nde petzi chimbe. Tando, in su 1958, a s’edade de deghennoe annos, aiat esordidu comente professionista cun una vitòria pro K.O.

In su 1968 at conchistadu su tìtulu mundiale de sos superlèbios in Tokio contra a su giaponesu Takeshi Fuji, cun un’esibitzione ispetaculare, abarrada in sos annales de sa box.

Fiat sa de tres bortas chi un’argentinu si coronaiat campione de su mundu.

Torradu a sa pàtria a pustis de carchi die, faghende iscalu in Honolulu, l’aiant afestadu in antis in Buenos Aires e a coa in Mendoza.

At mantènnidu su tìtulu, a pustis de ses difesas vitoriosas, finas a su 1972 e s’est ritiradu in su 1976.

Su record de professionista est de 136 giogos, 117 bintos, 14 pro K.O., 14 paregiados e 4 pèrdidos, unu ebbia pro K.O.

Est cunsideradu unu de sos pùgiles prus tècnicos in s’istòria de custu isport. Sa caraterìstica de Locche difatis fiat s’abilidade difensiva, chi li permitiat, pro more de riflessos ispantosos, de fàghere andare in bòidu sos corpos de sos aversàrios. Pròpiu pro custu motivu li mutiant El Intocable, paranùmene chi l’aiat postu sa rivista isportiva de Buenos Aires El Gráfico.

De caràtere brullanu, fiat connotu finas pro s’insajare pagu e si nch’isparire pro dies durante sos ritiros e pro sa passione pro sa sigareta: pipaiat puru in antis de nche pigare a su ring.

Sa fama de Locche fiat de gasi manna de èssere mentuadu finas in unu tango, Un sábado más.

(luca foddai)

Leave a comment

Send a Comment

S'indiritzu email tuo no at a èssere publicadu.