Sa ghia de su guvernu de dereta estrema de Israele, Benjamin Netanyahu, tenet semper prus problemas. Sa corte de giustìtzia de s’ONU at decraradu chi Israele si depet impinnare pro leare medidas lestras pro impedumare unu genotzìdiu a Gaza. Su sèberu benit a pustis de sa denùntzia de su Sud Àfrica chi at acusadu Israele de crìmines contra a s’umanidade. Su protzessu at a sighire, ma custa pedida de su tribunale est unu reconnoschimentu de una situatzione de arriscu pro sos palestinesos. Sa noa no est agradada pro nudda a sos polìticos serentes a Netanyahu: chie at naradu chi est un’acontèssida antisemita e chie s’est chesciende ca una fràsia gasi est essida a campu sa die a dae in antis de sa Die de s’ammentu de sa Shoah. Est dàbile chi at a cambiare pagu, ma su sinnale de unu sentidu internatzionale puriosu est craru.
Àtera acontèssida grae chi at corfadu Netanyahu est s’ocupatzione chi est sighida pro oras de una sala de sa Knesset de sos parentes de sos presoneris israelianos, leados dae Hamas su 7 de santugaine de s’annu coladu. Est s’ùrtima protesta de una movitia chi est creschende e chi est pedende fintzas una paghe lestra, sas dimissiones de su guvernu e eletziones noas. Sa lìnea de custu guvernu, prima de s’atacu de Hamas, aiat pesadu crìticas e protestas fitianas, chi si fiant pasadas cun sa gherra, ma como sunt torrende a nàschere.
In prus sos raportos cun sos americanos e sos alleados non sunt istados mai gasi malos. Biden cun Blinken sunt proende a batire Israele a una mesa cun sos palestinesos, ma Netanyahu est refudende. Sas parlatas de su Primu ministru, in ue at afirmadu chi un’Istadu palestinesu non si depet fàghere e chi isse nde cheret unu israelianu ebbia, ant peoradu fintzas sa mùtria generale. Ca sa timoria de gente meda est chi in una forma gosi no b’at a èssere tzidaninàntzia peruna pro sos palestinesos.
Gabriele Tanda
Leave a comment