Natzionale sarda de fùbalu: Vittorio Pusceddu est su Commissàriu Tècnicu nou

Natzionale sarda de fùbalu: Vittorio Pusceddu est su Commissàriu Tècnicu nou

Vittorio Pusceddu est su CT nou de sa Natzionale sarda.

S’allenadore de Buggerru est istadu presentadu a manera ufitziale sàbadu coladu in sa sala “Giorgio Pisano” de pratza “S’Unione Sarda” in Casteddu. «So onoradu – at naradu – apo a sighire su progetu de avalorare sos giogadores sardos chi non ant galu tentu sa possibilidade de mustrare sa proesa issoro.»

Vitòriu Pusceddu, tertzinu, leva 1964, at cumentzadu sa carriera sua de giogadore de fùbalu in sos giòvanos de su Casteddu e at fatu sa prima essida in Sèrie B in su 1984 cun s’iscuadra isolana. At bestidu sa màllias de Torinu, Àscoli, Udinese, Gènoa, Verona, Nàpoli, Fiorentina e de Èmpoli.

Torradu a Casteddu in su 1992, est istadu unu de sos protagonistas de sa balentia in Copa UEFA istajone 1993-94. Comente allenadore est istadu su vitze de Edy Reja in s’istajone 2003-04 cun su Casteddu, at ghiadu su Tavolara in Sèrie D e sa Beranile de su Casteddu pro tres istajones.

Vitòriu Pusceddu leat su postu de Berardo Mereu, mentres su restu de su staf tècnicu est istadu cunfirmadu.

Est istada annuntziada fintzas sa partida beniente: su 29 de maju sa Natzionale sarda at a isfidare cussa de sa Còrsica a Portivechju.

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *