Sa progressione de sas acontèssidas bèllicas in Ucraina est una cunfirma ulteriore de s’incapatzidade de sos istados de nos intregare serenidade e prosperidade.
Su chi amus bidu in duos annos de virus corona, cun vatzinos male partzidos peri su mundu, cun sistemas sanitàrios natzionales e istrutzione semper sacrificados e cun su divàriu semper prus mannu intre pagos barones e su bonu de sa gente, est sa cunfirma chi nemmancu una cunditzione pandèmica mudat s’andanta de custas entidades.
Sa governance mundiale pro firmare sa cursa de su virus (chi galu b’est) no esistet. De custa manera, semper chi custa siat finida a beru, nudda sos istados ant fatu pro sas àteras pandemias chi s’ant a presentare.
Su dinare chi no at a mancare mai, imbetzes, est su chi sos istados destinant a sa gherra. De su restu s’annestru bèllicu chi sa terra nostra connoschet a fitianu a ite serbit? Sa sìntesi l’ant iscrita oe sos operajos de sa Gkn, in Frorèntzia:
Sa gherra est cussu protzessu chi non nos agiudat a cumprèndere si est issa sa chi serbit a s’indùstria bèllica o si est s’indùstria bèllica chi serbit a issa. Su gastu militare no lu cresches si non cheres impreare sa fortza e, a tardu o a chitzo, sa fortza l’as a dèvere impreare pro giustificare su gastu militare. E custu gastu creschet mancari in sa sotziedade b’apat austeridade dae deghènnios.
Ite totu si diat pòdere fàghere cun sos 26 milliardos de gastu militare chi su guvernu Draghi ponet a cùrrere pro su 2022? E puru diat èssere prus chi non fàtzile – cherende·lu – a bi l’ammentare chi sas prioridades àteras sunt in custa fase noa de crisi pro sos traballadores e sas famìlias.
Imbetzes sunt issos, sos guvernantes, a nos ammentare chi custu est su mundu de sa cumpetitzione econòmica chi, una die o s’àtera, s’at a furriare in cumpetitzione bèllica. E sunt semper issos a nos nàrrere chi est cun sas armas ebbia chi podimus punnare a sa paghe.
Como ite at sutzessu? Sa Nato, chi nois connoschimus bene ite faghet in sa terra nostra, si nche cheret in sa làcana de una potèntzia chi non cheret un’àteru istadu in intro de cussa alleàntzia. E duncas: si b’at gherra pro chie non b’apat chie b’intret, ite at a acontèssere si calicunu disinnaret de si nch’essire? Nudda, si nos nch’amus a essire in pare a sos àteros pòpulos lassende·nos a palas sa sotziedade chi giustìficat sa presèntzia sua.
màuru piredda
Leave a comment