Naschet Azuni News Tv

Naschet Azuni News Tv

Est nàschida Azuni News TV, sa televisione de su Litzeu Azuni de Tàtari. A pustis de duos annos e mesu dae s’esòrdiu de su giornale de istitutu in lìnia como ddo’est finas una programmatzione vìdeu.

Su primu programma est sa rubrica Eureka show, ideada dae tres istudiantes de sa segunda F, Tullio Meloni, Diego Mellino e Giorgio Sanna.

Eureka show proponet intervistas a dischentes, maistros e àteru personale de s’iscola. Sa prima sèrie previdet tres puntadas de unu cuartu de ora s’una. Su primu a èssere intervistadu est istadu su professore de latinu e gregu Nicola Cadoni, chi intre, sas àteras cosas, at sutaliniadu s’impossibilidade de bìdere carchi cosa de positivu in sa didàtica a distàntzia, chi est dominende sa vida de su mundu de s’iscola dae oramai prus de un’annu.

E pròpiu durante custu tempus de didàtica a distàntzia ddis est bènnida s’idea a sos istudiantes, at naradu Tullio Meloni. Sos tres ant elaboradu su progetu, chi cheret contare carchi cosa subra de sas persones chi pòpulant, a livellu professionale e umanu, su litzeu clàssicu tataresu.

A sa redatzione de su periòdicu iscolàsticu partètzipant una chimbantina de dischentes, chi faghent parte finas de sa setzione musicale e corèutica, e chimbe professores.

A prus de sos artìculos su giornale on line oferit puru rubricas fissas che a Aggiornamenti su…, Spazio a… in ue si faeddat de cuddos entes e sòtzios chi collàborant cun s’iscola e Gli amici del Liceo Azuni, dedicadu a ex istudiantes e professores de s’istitutu.

Su Litzeu Azunui est nàschidu in su 1852, in su 1861 at otènnidu su tìtulu de Regio Liceo Classico e in su 1865 est istadu intituladu a Domenico Alberto Azuni, giurista tataresu. Dae su 1933 sa sede de s’iscola est in via Rolando.

Sos programmas de Azuni News Tv si podent abbaidare in su canale Youtube dedicadu.

(gianni muroni)

Leave a comment

Send a Comment

S'indiritzu email tuo no at a èssere publicadu.