Su 5 de maju de su 1821 moriat, disterradu dae sos inglesos in s’ìsula de Santa Elena, Napoleone. Cunsideradu unu de sos mègius condotieris de s’istòria, che a Lissandru Magnu, est de seguru una de sas figuras istòricas prus connotas e famadas, odiada e istimada a su matessi tempus.
Sa vida de su militare e polìticu corsicanu, nàschidu cun su sambenadu de Buonaparte, a coa frantzesizadu in Bonaparte, in Ajaccio in su 1769, in su 1793 s’est atopada cun su destinu de sa Sardigna.
Difatis, durante s’atacu de sos frantzesos, respintu dae sos sardos, a Sa Madalena, ddoe fiat issu puru, cun su gradu de tenente coronellu. S’ispeditzione fiat partida dae Còrsica, chi, dae su 1768, fiat possedimentu transalpinu.
Su fallimentu de s’impresa no aiat però rapresentadu un’istorbu tropu mannu pro sa carriera de su militare, chi fiat lòmpidu a èssere, in su 1804, imperadore de sos frantzesos.
(redatzione)
Leave a comment