S’est concruida in Tàtari su 23 de nadale sa de 16 editziones de Scrivere in jazz, su cuncursu internatzionale organizadu dae sa Associazione Blue Note Orchestra – Orchestra Jazz della Sardegna e realizadu in collaboratzione cun s‘Assessoradu a sa Cultura de sa Comuna de Tàtari e cun su cuntributu de sa Regione Autònoma de Sardigna, de su MIBACT e de sa Fondazione di Sardegna.
Ant partetzipadu 103 cuncurrentes e a sa fine sunt istados proclamados sos tres binchidores.
Pro sa prima setizone, dedicada a variatziones subra de su passu torradu, at bintu Gerardo Pepe, de Bari, cun Mamoiada’s Carnival.
Pro sa segunda, dedicada a sos cumponimentos lìberos, at bintu Edoardo Rojo, ispagnolu, cun Homeland.
In sa de tres setziones, dedicada a s’òpera de Bruno Tommaseo, su binchidore est istadu Thomas Haines, britànnicu, cun The Third One? The Best One.
Sas tres mùsicas sunt istadas sonadas in su palcu de su teatru comunale dae s’Orchestra Jazz della Sardegna, dirìgida dae Mario Raja.
Su presidente de sa Associazione Blue Note Orchestra Gavino Mele at ammentadu ca s’initziativa est partida in su 1991 cun s’iscopu de permìtere a musitzistas de totu su mundu de su cunfrontare cun su jazz e cun sa mùsica traditzionale sarda.
Sa manifestatzione est istada trasmìtida via internet, regollende unas 15.000 visualizatziones. Sa giuria fiat cumposta dae: Francisco “Latino” Blanco, Gabriele Comeglio, Michele Corcella, Mario Corvini, Oscar Del Barba, Luigi Giannatempo, Sid Hille, Pino Jodice, Paolo Silvestri, Roberto Spadoni, Marco Tiso, Gabriele Verdinelli.
In Portu Turres imbetzes aterunu assòtziu istòricu, sa Associazione Coro Polifonico Turritano at realizadu su situ internet nou de Voci d’Europa. Su Festival internatzionale de boghes polifònicas ocannu est lòmpida a sa de 37 editziones, in programma dae su 29 a su 31 de nadale.
Sas pàginas internet, comente at naradu sa presidente Maria Maddalena Simile, ant a permìtere de dare prus novas subra sa manifestatzione, nàschida in su 1979. In prus, a presse su situ at a èssere disponìbile finas in inglesu.
(gianni muroni)
Leave a comment