Motzione noa pro sa ratìfica de sa Carta europea. Ma non si faeddat de Istatutu e de istandard

de Mauro Piredda

Sighit sa batalla pro chi sa Carta europea de sas limbas bèngiat ratificada dae s’istadu italianu. Dae sos bancos de su Cussìgiu regionale (primu firmatàriu Zedda Paolo Flavio) nd’at essidu a campu una motzione, sa n°82, chi s’annanghet a sa n° 196 de sa legisladura colada (primu firmatàriu Amadu Salvatore). «Sa Carta – leghimus – inditat sas punnas e sos printzìpios chi sas partes si impinnant a aplicare a totus sas limbas regionales o de minoria chi esistint in su logu issoro, impinnat sos istados aderentes a sa promotzione issoro, nd’incoràgiat s’impreu iscritu e orale in sa vida pùblica e privada pro mèdiu de s’insegnamentu e de s’istùdiu».

S’obietivu de sa motzione est de impinnare su presidente Pigliaru «a promòvere in sas sedes cumpetentes, a comintzare dae sa Presidèntzia de su Cussìgiu de sos Ministros e dae sas cummissiones parlamentares cumpetentes, totus sas initziativas a sa ratìfica lestra dae parte de s’Itàlia» e si cuncordare cun «totus sos parlamentares sardos» pro illestrire sas protzeduras legislativas.

Totu custu a segus de una valutatzione de sos cussigeris firmatàrios (42 in totu) in pitzu de sas «medidas de amparu finas a como postas in èssere» e «chi no ant garantidu s’insegnamentu regulare e sistemàticu in sas istitutziones iscolàsticas».

Bene. Tocat però de nos pregontare: si dae Casteddu ant dèvidu presentare una motzione noa pro pedire a su Parlamentu de fàghere su chi ant giai fatu àteros 25 paisos, cale fiat sa punna de sos parlamentares (finas sardos) de Sel chi in su mese de austu ant presentadu un’emendamentu pro sa «rapresentàntzia in Parlamentu de sas minorias linguìsticas»? Petzi unu sistema pro si garantire mègius s’eletzione? Una “cuota sarda”? Si dae sos parlamentare sardos no est nàschida sa netzessidade de fàghere aprovare sa Carta europea, sa duda est pretzisu a si la pònnere.

De prus: si si pedit a sos parlamentares de fàghere su dovere issoro pro ite sos cussigeris non faghent su matessi cunforma a su pagu chi s’est faghende pro sa limba dae parte de sa Giunta? Est a nàrrere, finas su cussigeri Zedda (dae su perfilu facebook suo) narat chi «seus traballendi a fai in modu chi in su prossimu balantzu ddoi siat su dinai chi serbit». E in custu?

In fines, cando si faeddat de «medidas non bastantes» in pitzu de sa limba in s’iscola, est pretzisu a nos pregontare si sos cussigeris ischint o nono chi pro cussa punna bi cheret un’artìculu de s’istatutu chi nde boghet sa cumpetèntzia a s’istadu. E, mesches, chi bi cheret unu istandard.