S’època de s’anarchia normativa pro sos monopàtinos elètricos est acabada. Cussu chi finas a como est istadu cussideradu che a unu traste lèbiu, agiumai unu giogu o pragu de prus, oe benit paragonadu a una vetura, e pro custu depet sighire òbrigos severos e, in s’incasu, retzire santziones. Sa normativa noa introduit iscadèntzias pretzisas chi mudant de meda sa tzirculatzione urbana.
Dae su 16 de maju iscatat s’òbrigu de su contrassignu identificativu, una ispèssia de targa adesiva e plastificada. Sa manera pro lu otènnere est totu digitale, peri su portale de sa Motorizatzione Tzivile, in ue si intrat cun SPID/CIE e si pagat cun pagoPA. Posca, dae su 16 de trìulas, at a èssere obrigatòriu a tènnere s’asseguratzione pro sa responsabilidade tzivile (RC). Sas fortzas de s’òrdine ant a pòdere compudare in su deretu matessi si sas persones firmadas tenent sa cobertura in sas bancas datos ANIA.
Sas règulas, chi giai esistint, ant a èssere apricadas cun rigore. Dae su 14 de su mese de Nadale de su 2024, su cascu est obligatòriu pro totu sos ghiadores, no prus petzi pro sos minorennes; est proibidu a biagiare in duos in su monopàtinu; est proibidu a tzirculare contra manu, pràtica chi at giai causadu intzidentes mannos; sos monopàtinos non podent tzirculare in sos marciapiedis. Sa firmada si podet fàghere, petzi in sos istallos dedicados; tocat de lassare su veìculu in su marciapiede est cunsiderada una violatzione grave, ca creat barrièras architetònicas pro sos imbàlidos e sos betzos.
Sa tzitade de Tàtari s’est mòvida in antis cun campagnas de informatzione servìtziu de sharing, chi giai previadiat veturas cun identificativu e geolocalizatzione. Ma pro sos privados, su cunsìgiu est de si pònnere in règula cantu primu: a tzirculare sena contrassegnu, prus de sas multas, esponet a responsabilidades tziviles e penales mannas meda si si ruent in carchi intzidente. Prima de si pònnere a ghiare, tocat de s’assegurare de tènnere targa, cascu e, dae inoghe a pagu, sa pòlitza de assicuratzione.
Bobore Taras
_____________________________________________________________________________________
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment