Modas: unu progetu de s'ISRE pro amparare su cantu a tenore

Modas: unu progetu de s'ISRE pro amparare su cantu a tenore

Su 29 de abrile s’ISRE at presentadu in Nùgoro su progetu Modas chi punnat a istudiare, amparare e promòvere su cantu a tenore. Custa genia de cantu l’at reconnota s’UNESCO in su 2008 comente patrimòniu immateriale de s’umanidade e, fintzas pro custu, chi su progetu no est petzi cussu de istudiare su cantu a tenore, ma de lu fàghere crèschere e lu ispartzinare intre sos giòvanos.

Su progetu Modas at regortu sos datos de chie cantat, in ue lu faghet e chie est: b’at pagu prus de tres mìgia treghentos cantadores in una chentina de biddas de s’ala de Nùgoro, de Aristanis, de sa provìntzia de Tàtari e in sa Baronia. Semus faeddende belle de unu tertzu de sos comunes de Sardigna. Chie cantat no est ligadu a su pastoriu ebbia, comente calicunu pensat, ma est un’atividade de totu sos chi aprètziant custa genia de cantu. In prus ant registradu maicantas modas diferentes dae biddas medas, ca su cantu a tenore at in cada bidda una manera sua de cantu. Sa punna difatis est de sarvare custa richesa manna de calidades e a las passare a sas levas noas, cun progetos in sos territòrios in ue su tenore galu bi est.

Su progetu cheret fàghere retza intre sas comunidades, sos assòtzios e sos grupos, ammanigiare addòbios in sos cales megiorare e in ue fraigare ideas noas e unu movimentu prus mannu. Su diretore de su progetu est Diego Pani, un’etnomusicòlogu, e su coordinadore est Bustianu Pilosu, unu chircadore. Su giassu in retza si podet bìdere, fintzas in sardu, inoghe e tenet giai sos nùmenes de sos referentes e sos datos de cada bidda, ma fintzas immàgines e vìdeos. Sos addòbios imbenientes sunt in Ovodda su ses de maju, in Orthullè su trèighi e in Nule su binti.

(redatzione)

Leave a comment

Send a Comment

S'indiritzu email tuo no at a èssere publicadu.