Nàschidu in s’istiu de su 1995 e pàschidu in milliardos de computer, a Internet Explorer l’at acabbadu oe sa Microsoft matessi cun un’agiornamentu de Edge (chi como l’at pigadu su logu). E chi fiat ora de nche lu bogare dae mesu lu podimus nàrrere a forte e a craru.
Tzertu est chi sa cosa at a alliare problemas meda a unu muntone de utentes, mascamente a chie, pro nàrrere, depet impreare Explorer pro fàghere girare programmas aziendales. In custu casu est possìbile a bi la sighire cun s’impreu de sa versione 11 de IE in modalidade “emulatzione” intro de Microsoft Edge.
A minudu, bisòngiat a abèrrere su navigadore Edge e seberare unu in fatu a s’àteru custos cumandos chi gasi los connoschimus in italianu: “Impostazioni”, “Browser predefinto”, “Consenti di ricaricare i siti in modalità Internet Explorer”, seletzionende a pustis “Consenti” e torrende a aviare su navigadore.
Lentu chi pariat faghende su fràigu de Roma, Internet Explorer at fraigadu un’era. Non si podent contare totu sas vulnerabilidades 0-day e sas fartas chi l’ant acumpangiadu in 28 annos.
A su presente a Internet Explorer lu mentovant prus de sos trenos in ritardu. Sa pàgina Facebook “Internet Explorer Italia”, pro nàrrere, est un’esèmpiu. Giai pro comente si presentat. Difatis podimus lèghere deretu, in sa bio, chi «A pustis de unu meledu perlongadu amus disinnadu de serrare su blog de MySpace e de colare a Facebook». Su post de s’urtima die de s’annu in pessu coladu (publicadu a sas 3 de merie pro non si nche colare) custu narat: «È ora di organizzare capodanno». Su matessi die s’annùntziu de sa morte de Papa Woitila. E a muntones de post che a custu, petzi pro si befare de unu navigadore chi, comente amus naradu, fiat lentu chi pariat faghende su fràigu de Roma.
Adiosu Internet Explorer, salude a nois fintzas a torrare tue.
Gianfranca Orunesu
(foto GetaGaia, CC BY-SA 4.0, via Wikimedia Commons)
Leave a comment