Sa sotziedade editoriale Mediando, de Tàtari, at detzìdidu de ammentare a Manlio Brigaglia, professore e intelletuale gadduresu, cun una publicatzione.
Brigaglia, chi pro annos at imparadu istòria in su litzeu Azuni de sa capitale turritana, est mortu su 10 de maju, tres annos a como.
A sa fine de custu mese s’editore Simonetta Castia at a fàghere essire unu libru in ue sunt regortos paritzos de sos interventos chi su professore de Azos at iscritu pro su cuotidianu locale de Tàtari pro 25 annos, dae su 1994 a su 2018, in sa rubrica mutida Memorie Sassaresi.
S’ùrtimu artìculu iscritu est de su 4 de maju de su 2018, una chida in antis de sa morte.
Sos interventos seletzionados ant a èssere insertados cunforma a su tema tratadu.
Custu libru, publicadu de acordu cun sa viuda de Brigaglia, Marisa Buonajuto, est un’anteprima de ateruna publicatzione prus manna chi at a essire semper in su 2021.
(redatzione)
Leave a comment