– de Marco Murgia –
Apo lassadu su PD. Sigo a fàghere politica in RossoMori. Sa detzisione est cumprida dae duos annos, ma fia curretu a acabbare sa consiliadura in su PD, partidu chi m’at candidadu a su Consìgiu comunale de Casteddu 5 annos a oe.
Is resones de custa essida sunt de caràtere polìticu generale:
1. non b’at prus perunu tretu, in su PD, pro traballare a unu partidu sardu indipendente e progressista e su partidu in Sardigna est incarcadu deretu a su chi detzident in Roma.
2. su PD est mudende a lestru (antzis sa muda est acanta a essere cumprida) in unu partidu de tzentru chi càstiat a dereta cando chi custos sunt tempos chi diat serbire a faghere politicas de manca.
Sigo a crèere in su partidu polìticu comente forma printzipale de sa rapresentàntzia (cun totas is annoaduras chi serbint a tempus de oe). E est cun custu printzìpiu – e cun s’abreu de dare unu contributu a nde pesare unu partidu mannu, sardu e progressista chi traballet pro megiorare sa vida de is sardos, pro mèdiu de unu protzessu de emantzipatzione e de autodeterminatzione – chi apo a sighire a fàghere polìtica in su partidu RossoMori, partidu chi custas ideas ddas ponet a fundamentu de sa politica sua.
Marco Murgia
Cussigeri Comunale de Casteddu
Leave a comment