Redatzione
Gavino Manca, presidente de sa segunda cummissione de su Consìgiu Regionale, addòbiat su Corecom e leat impignos importantes pro sa chistione de sa limba sarda in Rai. Ma dae banda de sa Giunta Regionale peruna declaratzione o fatu cuncretu.
Galu una bia s’esecutivu de Frantziscu Pigliaru si faghet agatare impreparadu a contu de una chistione de importu comente cussa de sa presèntzia de sa limba de minoria in s’emitente pùblica e de sa programatzione culturale regionale. Giai fiat capitadu carchi chida como cando sa deputada Romina Mura fiat resessida in Parlamentu a si fàghere aproare unu documentu de intentos in àula in su mudìmene de su guvernu regionale.
A onni manera, Gavino Manca, presidente de sa cummissione chi si impitzat de limba sarda, a pustis de s’addòbiu cun su Corecom Sardigna (comitadu de vigilàntzia regionale istitutzionale in contu de matèria radiotelevisiva) at ufitzializadu una declaratzione chi ponet a traballare a issu e a totu sa magioràntzia finas pro una lege ispetzìfica de su setore. Ma, dae arruga Trento o arburada Trieste, peruna nova.
«Nos impitzamus a intervènnere cun su Guvernu – at naradu Manca, de su pd tataresu – pro chi si potzat acumprire su Cuntratu de Servìtziu 2013-2015 pro sa parte chi pertocat sas minorias linguìsticas e sas culturas locales».
Sa declaratzione de Manca, isparghinada cun unu comunicadu ufitziale de su Consìgiu Regionale, est lòmpida a segus de s’addòbiu ufitziale, su 2 de trèulas coladu, de sa cummissione segunda cun sos cumponentes de su Corecom.
«Su cuntratu nou de servìtziu intre su Ministèriu de s’Isvilupu econòmicu e sa Rai, prevedit, comente òbligu de su servìtziu pùblicu, non petzi s’amparu de sas minorias linguìsticas, ma finas s’avaloramentu de sas culturas locales e regionales cun su mèdiu de trasmissiones radiofònicas e televisivas». Pro s’esponente pidiinu tataresu sa Regione depet fàghere intèndere sa boghe sua e l’at a fàghere cun una lege. S’at a bìdere si finas custa promissa s’at a acumprire sende chi, pro como, su perìgulu mannu est chi sa sea regionale la tanchent pro more de sos finantziamentos mutzados dae su Guvernu de Matteo Renzi.
In custu turmentu, su discuidu chi finas a como est mustrende su guvernu regionale pro sa chistione linguìstica no agiudat. In s’addòbiu de su 2 de trèulas, in cara a totu sa cummissione, fiant presentes pro su Corecom su presidente Giorgio Atzori e su cumponente Mario Carboni.
Sa Sardigna est in segus meda a àteras regiones comente Trentinu, Sud Tirol, Friuli, Badde de Aosta. Su Friuli pro nàrrere gastar 11,6 miliones de èuros ocannu, sa Vallèe 2,2 e su Sud Tirol 20. In su bilàntziu regionale de ocannu si prevedit petzi 300 mìgia èuros pro sa limba in Rai. E non s’ischit si cun su patu de istabilidade, los ant a gastare a beru. Diant serbire fatos cuncretos dae s’assessora Firino e dae su presidente Pigliaru. Atos chi non sunt una prioridade, a dolu mannu. E chi ponent in arriscu atividades e postos de traballu.
Leave a comment