Sa sede de sa fiera at a èssere Terranoa in su Museu archeològicu, ma sa manifestatzione at a èssere rapresentativa de totu sa Sardigna. Make Faire Sardinia, eventu dedicadu a s’innovatzione tecnològica, est in programma pro su primu, su 2 e su 3 de trìulas. Semus faeddende de sa segunda editzione – a pustis de sa de su 2020 – semper organizada dae su Fab Lab de Terranoa ma cun una prospetiva diferente. Sa manifestatzione, nàschida in su 2006 in San Francisco, nche lompet duncas a terra sarda cun s’obietivu de creare unu network de ideas e innovatziones e at a èssere coordinada – in un’òtica internatzionale – dae sa comunidade de sos makers.
Su museu at a èssere partzidu in duas àreas: in su pianu terra sa parte espositiva cun sos stand de sos makers; su primu pianu at a èssere dedicadu a sa videogame art cun dibatas e finamentas una televisione in Twitch.
Una novidade de vàllia de ocannu est sa formatzione pro sos giòvanos cun laboratòrios digitales e creativos incumintzende dae su 28 de làmpadas.
Espertos, apassionados e curiosos ant a èssere unidos dae su tema de s’innovatzione impuntzada dae sos artesanos digitales e ant a presentare progetos e cumpartzire connoschèntzias e iscobertas, aprontende connessiones noas movende dae bassu e punnende a dialogare cun impresas e istitutziones.
Sa paràula crae at a èssere “glocal”, est a nàrrere su ligàmene intre globale e locale; su fil rouge de sa fiera est imbetzes “Cittadini del mondo e fabbricatori del luogo”. Tema, custu, ispiradu dae Bachisio Bandinu in su 1996, cando in “Lettera a un giovane sardo” naraiat chi sa via pro essire dae unu regionalismu impoveridu est “a ischire comunicare cun profetu intra locale e globale, a s’abèrrere a su nou sena si pèrdere”.
Sa de Maker Faire Sardinia est una manifestatzione chi at unu caràtere interdisciplinare in ue cultura, arte, moda, tecnologia e impresa mirant a sa matessi diretzione.
Gianfranca Orunesu