«Locos de Cultura est unu progetu de valorizatzione in limba sarda a ghisa de contu de biàgiu peri noe biddas chi dae su 2008 sunt parte de s’Unione de sos Comunes de su Monte Arvu: Bitzi, Lodè, Lùvula, Onanie, Orune, Osidde, Pasada, Thiniscole e Torpè. Postos a nord est de Sardigna e in intro de regiones istòricas e geogràficas diferentes (intre Barbàgia e Baronias), aunidos si sunt pro pònnere in evidèntzia sas galanias de sos paesàgios issoro, de sos logos de devotzione, de sos monumentos istòricos e de sas àreas de interessu archeològicu dende·li su prètziu chi meressent». Como a custu progetu l’ant a presentare in forma pùblica su 28 de abrile in Thiniscole ca, in prus de valorizare limba e territòriu, a su chi narat su presidente de s’ente subracomunale, b’at de acrèschere in sa tzitadinàntzia su significu e s’importu de sa Die de sa Sardigna. Su progetu est finantziadu cun sos fundos de sa lege 22 de su 2018 e, a su chi narat su presidente de s’Unione Barore Ruiu, sìndigu de Pasada, «naschet cun sa punna de potentziare s’impreu de su sardu in s’amministratzione pùblica e finamentas pro mustrare comente issa potzat èssere veìculu de avaloru de sas prendas architetònicas e archeològicas de custos tretos». Sas prendas? «Su sèberu – leghimus in su situ – nch’est rutu in unos cantos puntos de interessu mannu, che chi esserent crae pro nch’intrare a sa domo de S’Unione de Sos Comunes e pro pesare cuncordu cun su chi, ùnicu, custas biddas tenent: su bidditzolu nuràgicu de Romanzesu in Bitzi; su logu de devotzione antigu de sa Purìssima in Lodè; su santuàriu de Santu Frantziscu de Lùvula cun sas duas festas suas de fide comunitària; sa crèsia de Santu Pretu de Onanie, prenda minuda de architetura romànica; su situ misteriosu de Sant’Efis in Orune; sos tretos de S’Iscopalzu in Osidde cun su nuraghe in cue imponente; su Casteddu de sa Fae cun s’ammaju suo in Pasada; sa turre de bàrdia seculare e mai istraca de Santa Luchia de Thiniscole; su nuraghe Santu Pedru de Torpè, bastione imponente e marcu ingeniosu de sa gente antiga». S’apuntamentu est a sas 10.30 in Thiniscole in sa sede de s’Unione de carrera de Isalle.
màuru piredda
Leave a comment