Liquidació: mare, morte e poesia

Liquidació: mare, morte e poesia

Sa vida de una pipia chi ismànniat, si còjuat, tenet fìgiu e est inghiriada dae sa morte, pro chistiones professionales e personales, est su tema printzipale de Liquidació, romanzu in catalanu iscritu dae Rosina Ballester.

Su contu tenet comente fundu sa Catalogna e sas ìsulas Baleares. A una Bartzellona sèria e intelletuale si contraponet una Tarragona prus allegra e prena de sa lughe de su mare, in ue Guillermina, custu su nùmene de sa protagonista, andaiat a istare in s’istade in domo de sa giaja.

Una domo cun un’ortu mannu e una biblioteca galu prus manna, su primu cuntatu e su prus ìntimu de sa pitzinna cun sa literadura.

S’istòria cumintzat cun issa pitzochedda, in sos annos ‘50, sighit in sos ‘60 cun un’escursione in Inghilterra, raru momentu de libertade, e andat a in antis intre sos ispidales in ue Guillermina traballat, finas in Madrid.

A fàghere de corona a sa vida sua una mama anafetiva e unu babbu bonu ma incapatze de amare.

Sos ammentos prus dultzes sunt pro sa tzeraca bènnida dae s’Ispagna meridionale, María Egea Lorca.

De totu sos personàgios, unu Macià, su frade istimadu de Gullermina, est forsis su protagonista beru de sos fatos. Sa sorte sua tràgica ddu faghet èssere una presèntzia costante durante totu s’esistèntzia de sa pitzinna/fèmina.

Su raportu conflituale cun su corpus, su suo, e su de sos mortos chi bidet in s’ispidale, s’acàpiat a sos cojuios disditzados. A cosire sos diferentes capìtulos de un’esistèntzia prena de tristura ma finas de autoironia sos monòlogos interiores chi dant a su contu s’andamentu de sas undas de su mare, tantu caru a Guillermina, in unu andare e bènnere de ammentos.

Rosina Ballester est nàschida in Les Borges del Camps. A su traballu de infermiera at semper unidu s’atividade literària, cun poesias in ispagnolu e a coa in catalanu. Liquidació est su primu romanzu. S’editore est AdiA Edicions de Majorca.

(gianni muroni)

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *