– de Salvatore Serra –
Polìtica linguìstica cheret nàrrere finas a fàghere in sardu revistas de istùdios linguìsticos, pro afortire sa capatzidade de sa limba nostra de operare cun unu registru artu.
Oe bos presento su nùmeru 3 de sa revista “Limbas “, publicadu in su 1989 dae sas Editziones Papiros pro initziativa de su Grupu Natzionale Sardu de sa Liga pro sas Limbas de sas Natzionalidades Minoritàrias de s’Istadu Italianu.
In custu nùmeru, a pustis de sa presentada de su diretore Diegu Corràine, b’at interventos de Heinz Jurgen Wolf, de Eduardo Blasco e de Diegu Corràine etotu. S’òpera de bortare unos cantos testos de custu nùmeru est istada de Zuanna Maria Ispanu e Badore Serra. Sa figura de sa coberta est unu cumponimentu gràficu otentu cun lìteras de alfabetos diferentes.
Inoghe b’at unas cantas rias de un’istùdiu linguìsticu de su Prof. Heinz Jurgen Wolf subra de su Privileziu logudoresu.
________
In su 1851 L. Tanfani at publicadu in s’ “Archivio Storico Italiano” , “Due carte inedite in lingua sarda”. Sa segunda carta, datada e localizada, est istada iscrita in su 1212. Sa prima, in ue non b’at inditadu nen logu nen data, diat deper esser, – cunforma a su chi iscriet Tanfani – de in antis de su 1086 o su 1089, data de sa morte de unu pìscamu numenadu in custu documentu. A pustis de tando, custa carta est colada pro esser su documentu prus antigu in limba sarda, e, pro custu, tenet s’onore de figurare comente tale in sas antolozias. A pustis de esser istada publicada in sas de Monaci, e de Savj-Lopez e Bartoli, est istada editada torra dae A. Solmi, chi nd’at currezidu calicuna forma. S’editzione belle definitiva l’at fata Debenedetti e, in custa forma, est colada a sas antolozias de Monteverdi, Ugolini, Ruggieri, Monteverdi galu, Momavi (ed. noa), Sampson e Moreno-Perra, sena ismentigare sas Origini de Tagliavini …
Leave a comment