«Amancant pagos meses a is eletziones in Sardigna. Unas cantas coalitziones sunt nàschidas, àteras forsis ant a nàschere e galu non connoschimus totus is candidados. De cada manera, pro medas, sa campagna eletorale est incumentzada giai de diora: cunferèntzias, partetzipatzione a eventos, comunicatzione in is sòtzial. Is temas sunt medas e unu tema de importu mannu chi torrat prus bortas est su de traballare pro fàghere torrare a bìvere is limbas de Sardigna. Ca dd’ischimus, si dd’ant nadu poetas, cantadores e istudiosos: cando s’at a mòrrere sa limba sarda s’at a mòrrere su pòpulu sardu etotu». Gasi comintzaiat s’apellu de s’Assemblea natzionale sarda in contu de impreu de sa limba in s’allega polìtica. Peristantu, cun sos meses colende·si·nche e cun pagas dies a sas votatziones, su restu de s’apellu parte iscritu oe etotu. «Si però andamus a bìdere su chi organizatziones medas iscrient in is comunicados e in is retzas sotziales, si andamus a iscurtare una debata pùblica, no agatamus e no iscurtamus giai mancu unu faeddu in sardu o àteras lìnguas de Sardigna, francu su nùmene de carchi organizatzione o carchi slogan – mancari sa prus parte de is polìticos e is militantes faeddent e cumprendant su sardu. In Sardigna, faeddare e iscrìere in sardu e in àteras linguas de Sardigna est unu sèberu polìticu, est a ammostrare chie ses, est a gherrare pro sa limba tua e pro s’unidade de is sardos. E a non ddu fàghere, faeddende e iscriende semper in italianu, est unu sèberu polìticu chi agiudat sa limba italiana a ochire is limbas de Sardigna, e cun issas su pòpulu sardu. Sa resposabilidade de chie rapresentat unu partidu o una organizatzione, de chie est a intro de is istitutziones, de chie faeddat cara a personas medas, est manna meda». B’at de lis torrare gràtzias a sas e a sos de Ans, ma fintzas ocannu est andende gasi. Cheret chi nde faeddemus pro chi non colent àteros chimbe annos de nudda istende su mancu.
redatzione
Leave a comment