Un’infinidade de libros a disponimentu de s’ospidale de Nùgoro nch’est lòmpida gràtzias a sa donatzione de bator tzitadinas nugoresas e de sa libreria Mieleamaro.
Sos patzientes minores si podent istraviare pro mèdiu de sas pàginas de pabiru chi ant invasu su repartu de Pediatria. Ben 8 iscatulones de libros chi finamentas genitores e degentes mannos de àteros repartos podent impreare.
Sas 4 benefatoras de su giru de sa libreria Mieleamaro ant organizadu sa regorta de libros e, in s’ospidale, ant àpidu su sustegnu de su diretore de Nefrologia e Dialisi Franco Logias. Su dotore, giai nòdidu pro èssere responsàbile de sa rivista “Tecniche nefrologiche e dialitiche”, est finamentas unu letore abramidu, apassionadu de cultura e ideatore de su progetu de meighina narrativa de s’Asl de Nùgoro.
«In prus de èssere un’istrumentu de giudu pro megiorare s’accollièntzia in su mentre de su recòveru – at naradu Logias – sos libros in ospidale contribuint a umanizare sos servìtzios sanitàrios. Pro custu torramus gràtzias a sas bator donatoras Claudia Gambioli, Manuela Flore, Stefania Papa e Francesca Fadda e sa libreria nugoresa Mieleamaro».
Gianfranca Orunesu
(Foto ASL Nùgoro)