Robert Francis Prevost est su Paba nou, votadu eris dae sos cardinales riunidos in sa Capella Sistina pro su conclave. In duas dies, a pustis de bator iscrutìnios ebbia, sos prìntzipes de sa Crèsia ant agatadu su nùmene de su sutzessore de Fratziscu, mortu su lunis de Pasca manna.
Prevost est istatunidense, nàschidu in Chicago su 14 de cabudanni de su 1955. Francu sos istùdios de Teologia, tìpicos de sos preìderos, at istudiadu matemàtica e tenet un’àtera làurea in filosofia e unu dotoradu in Deretu canònicu. A trint’annos sa Curia l’at imbiadu in su nord de su Perù comente missionàriu, in sa diòtzesi de Chulucanas. Faghet parte de s’òrdine de sos agostinianos, chi fiat in sas orìgines suas ligadu a sa vida de sos eremitas, ma chi a pustis est istadu impitadu in sas missiones. Agostinianos fiant Martin Lutero, su babbu de sa riforma protestante e Gregor Mendel su babbu de sa genètica. Dae su 2001 a su 2013 Prevost est su priore de s’òrdine, est a nàrrere sa ghia, e in su 2014 paba Frantziscu lu nùmenat pìscamu. Istat pro su prus in Perù e non tenet ligàmenes gasi fortes cun sos Istados Unidos: est americanu, ma siat de su cantu nord, che de su sud. In su 2023 paba Frantziscu lu faghet cardinale e li dat funtziones meda, sa prus importante est cussa in su Dicasteru de sos pìscamos.
In sa parlata sua dae sa Lògia de sa beneditziones, a pustis de sa fumada bianca, at incumintzadu faeddende de paghe, e de unidade de sos cristianos. Su naturale suo a cunfrontu cun Bergoglio est prus mugròninu, pagu abertu a sos gestos mannos e ispantosos. Sas positziones suas in contu de sotziedade sunt craras finamentas dae su nùmene seberadu: Leone XIII est su pontefitze de sa Rerum novarum, s’entziclica chi faeddaiat de traballu e de sa bisione catolica de sa sotziedade. Est craru, tando, chi cheret sighire cun aficu sas situatziones de sos pòberos e de sas persones migrantes. Iscàndalos mannos non l’ant tocadu: duas cuntierra a subra de abusos sessuales de preìderos in sas diòtzesis sua parent siant finidos in nudda. Sas positziones suas a subra de àteras chistiones sunt betzas e est inùtile a las bogare a campu dae como: s’at a bìdere in s’atividade sua cale àndala at a leare.
Gabriele Tanda
Leave a comment