L’ant trantzida a su 3 de santugaine s’udièntzia preliminare de sa giùighe de Casteddu, Ermengarda Ferrarese, pro valutare sa rechesta de rinviu a giudìtziu fata dae su Pùblicu Ministeru Andrea Vacca contra a su presidente de sa Regione Christian Solinas e a s’assessora a sos Afares Generales Valeria Satta. Sa resone est unu impedimentu legìtimu de Solinas, su de 5.
Ambos sunt acusados de abusu de ufìtziu, s’assessora Satta pro tentada concussione puru, in s’àmbitu de s’inchesta subra de sas nòminas de duos diretores generales in capu a sa Regione: Silvia Curto a sa Presidèntzia e Antonio Pasquale Belloi a sa Protezione Tzìvile.
E est istadu trantzidu a su 3 de santugaine finas su dibatimentu, cun ritu abreviadu, a Maria Grazia Vivarelli, capu de Gabineto de sa Presidentzia de sa Regione, issa puru indagada.
Prus o mancu unu mese faghet, in unu interrogatòriu de prus de un’ora e mesa, su Presidente Solinas aiat sutalineadu chi non b’intrat nudda cun sas acusas de sa Procura: pro issu fiant incàrrigos fidutziàrios, ca fiat netzessàriu chi sa figura desinnada esseret de fidùtzia pro s’òrganu polìticu pro pòdere mandare a in antis su traballu; a valutare sos recuisidos pedidos dae sa normativa depiant èssere sos ufìtzios cumpetentes, chi no ant dadu a ischire de perunu problema, e duncas sa nòmina est istada fata.
Mariantonietta Piga