Cras essit in sos tzìnemas italianos su film nou de sa “Sirenetta”. Famadu comente cartone animadu essidu in su 1989, oe l’ant giradu comente “live-action” chi est una genia de pellìcula normale, ma chi at s’annanta de sos efetos ispetziales chi ammisturant s’animatzione cun sa retzitatzione de sos atores. Sa produtzione est de sa Disney, comente sa versione a dae in antis, e at leadu dinari e energias maicantas.
S’elementu de importu est chi b’at Sardigna meda in custa versione. Mescamente pro s’ambientatzione: Casteddu sardu pro su burgu medievale; Lungoni pro su mare de Rena Majore, de Rena Mateu e de Monti Russu e fintzas sa costera de Cala Moresca in Fìgari. Sardigna chi s’at leadu unu rolu de protagonista in una pellìcula de importu pro s’indùstria de sos films americana. In custas dies unu de sos responsàbiles de custu resurtu mannu, sa Sardegna Film Commission at ammanigiadu, in paris cun sas Pro Loco, una presentada ispetaculare in Casteddu sardu cun immàgines projetadas in sa bidda, interessende imprenta e fintzas carchi influencer, posca ispetàculos, cuntzertos, giogos pro sos pitzinneddos in sas àteras biddas: una festa manna pro un’operatzione chi at batidu e chi at a batire dinari meda, fatende intrare s’ìsula in s’immaginàriu de sas levas noas. Una manera pro pònnere sa Sardigna in mesu a su mundu sena provintzialismos e, mescamente, traballende in paris cun chie benit dae fora, resessende a bi balangiare ambos duos.
(redatzione)
Leave a comment