Carchi chida a como, in sa trasmissione televisiva “Otto e mezzo” de La7, s’infetivòlogu Massimo Galli at naradu chi su vatzinu «funzionicchia». Est a nàrrere chi est de giudu pro pònnere in seguresa gente meda, pro evitare de non nche la giùghere a «s’ospidale e nemmancu a campusantu».
Fiat petzi faeddende de sa capatzidade de custos vatzinos (basados subra su virus «chi tzirculaiat un’annu a como e nemmancu inoghe») pro firmare s’ispainada de sa variante inglesa.
Ma nudda at firmadu sas ingiùrgias de parte manna de s’audience chi bidet como in Galli, como in Speranza, como in carchi àteru sìngulu sa cajone de sas cunsighèntzias sotziales de sa pandemia, s’orìgine de sos provedimentos de serrada.
Bene. Oe su primu ministru de su Rennu unidu, Boris Johnson, at faeddadu pròpiu de vatzinos e de serradas narende chi, nointamen una campagna de somministratzione prus chi non massiva, «the bulk of the work in reducing the disease has been done by the lockdown». Est a nàrrere chi «su bonu de su traballu pro reduire sa maladia l’at fatu su lockdown».
Est a nàrrere chi su vatzinu «funzionicchia» finamentas in cue? «People need to understand that the success of the vaccine rollout is great. But as we unlock, the result will inevitably be that we will see more infection, that sadly we will see more hospitalizations and deaths – and people have just got to understand that».
Pagu prus o mancu: «Sa gente cheret chi cumprendat chi sa resèssida de sa campagna vatzinos est manna. Ma comente amus a abèrrere amus a bìdere sena duda peruna infetziones noas e, a dolu mannu, prus gente in ospidale e in campusantu. Sa gente cheret chi lu cumprendat».
Duncas Boris Johnson prus catastrofista de Massimo Galli? Duncas cheret chi cumprendamus nois puru?
Màuru Piredda
Leave a comment