de Salvatore Serra
Su logu de nàschida est Serramanna. Sos babbos sunt bator giòvanos laureados. In su 2009 Càralu Mancosu, Pedru Sanna e sos frades Giosepe e Gabrielle Littera ant bogadu a pìgiu su Sardex, sa prima moneda cumplementare nàschida in sa Repùblica Italiana, in unu tempus chi sa gente fiat connoschende una crisi econòmica manna.
Su Sardex l’ant pensadu comente una càmera di cumpensatzione de dèpidos e crèditos, in ue non b’est su tassu de interessu e s’unidade de cuncàmbiu si impitat sceti pro comporare o bèndere benes o servìtzios.
S’obietivu finale no est s’aorru de moneda, cunsideradu chi non b’at interessos e non si podet mancu cambiare s’unidade in èuros, ma s’aumentu de sos cuncàmbios cummertziales de sas impresas.
A pustis de su cumintzu in Sardigna, sunt essidas a campu àteras modedas cumplementares in unas cantas regiones de s’Istadu: in Piemonte b’est su Piemex, in Lombardia su Linx, in Vènetu su Venetex, in Emìlia su Liberex, in su Làtziu su Tibex, in Campània su Felix, in Badde de Aosta su Valdex.
Pro cumprèndere mègius comente funtzionat su Sardex nos podet agiuare un’esempru cuncretu. Pensemus, pro nàrrere, a unu maistru de linna de Casteddu chi detzidet de marcare s’atividade sua a su tzircùitu. Pro si pòdere marcare tocat a pagare unu tantu a s’annu chi càmbiat cunforma a sa mannària de s’azienda; tando si retzit unu currispetivu in Sardex chi, duncas, si podet cumintzare a impitare.
Sigomente 1 Sardex balet 1 èuro, ponimus chi in su mamentu de s’iscritzione b’apat una base de 500 Sardex e chi duncas si podat cumintzare a bèndere e comporare in su tzircùitu, in ue b’at finas unos cantos mediadores chi agiuant sos cuntatos.
Un restorante de Casteddu, tando, podet pedire a su maistru de linna una mesa noa, e su maistru de linna at a retzire su currispetivu in Sardex cun una transatzione pro mèdiu de su tzircùitu.
In su matessi tempus, su maistru de linna podet pagare una chena in cussu restorante cun sa matessi moneda cumplementare, e podet finas comporare petza dae unu masellaju o unu cursu de inglesu dae unu tzentru linguìsticu.
In custa manera s’agiuant sos cuncàmbios, finas ca sos Sardex cherent impreados intro de una rata de tempus determinada; duncas, sigomente non b’at interessos e non si podet fàghere su càmbiu in èuros, totu sos iscritos sunt intzentivados a gastare, fachende girare s’economia.
Cada operatzione benit arrastrada, cun sas tassas chi pustis si pagant in èuros. Totu cantu, duncas, est in craru, e pro custa resone sa moneda cumplementare tenet s’amparu de istitutziones comente Confindustria e Confcommercio.
Leave a comment