Ite est capitende in Israele?

Ite est capitende in Israele?

A nadale at torra leadu su poderiu in sa Knesset, su parlamentu de Israele, Benyamin Netanyahu, cun su guvernu prus a dereta de s’istòria de su Paisu. Como b’at una cuntierra intre su presidente e sa corte suprema, ca su Netanyahu la cheret pònnere a suta de su controllu suo. Est dae annos chi sa polìtica de s’Istadu ebràicu non mudat sèmida e paret peorare, ma comente mai?

Sa resone prus de importu est demogràfica e religiosa. Sas famìllias ortodossas faghent prus o mancu sete fìgios cada una, chi creschent in una sotziedade e un’ambiente ortodossu chi los batit a votare e figiare comente sos babbos e sas mamas. In pagos annos custa tàtica demogràfica los at batidos a otènnere su controllu de sa polìtica e un’influèntzia manna in s’opinione pùblica de su Paisu. Pro cumprèndere sa fortza chi ant, cando bi fiat sa pandemia, cun sas proibitziones chi connoschimus, su guvernu non at cherfidu firmare sos eventos religiosos prus de importu de custos grupos chi fiant prenos de gente.

Finamentas sas tensiones e sa polìtica contra a sa populatzione palestinesa derivat dae custa situatzione. Sos ebreos prus cunservadores, cherent conchistare totu Israele, refudant s’esistèntzia de sa Palestina, cherent un’Istadu chi siat prus religiosu e partzidu in ebreos e àrabos: custos renessent a espressare sas figuras prus de importu de su guvernu. Pro esempru, Itamar Ben-Gvir, su ministru de sa seguresa pùblica de su guvernu nou, est famadu pro sas positziones ratzistas e pro èssere andadu a una manifestatzione de àrabos cun una pistola.

Sos ebreos de manca, prus modernos e liberales, proant a manifestare e a si chesciare. Faeddant cun sos giornales, de fora e de intro, ma a sas eletziones sunt semper sa minoria. E abbaidende s’andanta de sa sotziedade est difìtzile chi potzant bìnchere luego.

(redatzione)

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *