Ite at a nàrrere Soru in Sedilo de sa polìtica linguìstica de Pigliaru? S’at a espònere cun carchi crìtica? O at a lassare logu a sa diplomatzia de partidu? Custas sunt sas pregontas prus dìligas chi totus si faghent isetende s’eventu de cras.
A sas chimbe de merie in sa sala Prima Ighina de sa bidda de sa provìntzia de Aristanis, acadesset su chi su blogger Roberto Carta at definidu s’avenimentu polìticu-linguìsticu de s’annu. Renato Soru torrat a faeddare de limba sarda pustis unos cantos annos de mudìmene. Lu faghet cun Giuseppe Corongiu (chi in s’ocasione torrat a presentare su libru suo ‘Il sardo una lingua normale’) chi a su tèmpus de sa faghimenta de sa LSC traballaiat cun issu in Regione.
E chi posca, in su 2008, aiat nominadu issu etotu diretore de servìtziu.
Posca una ‘mesa’ de arresonos cun esponentes de su movimentu linguìsticu e de su CSU (Coordinamentu pro su Sardu Ufitziale). Ma finas calicunu ‘simpatizzante’ de su PD chi militat in su Movimentu Linguisticu. Ant a faeddare Antonello Garau, Giovanna Tuffu, Clara Farina, Manuela Ennas, Bovore Mele e Marco Murgia.
Sa Limba Sarda Comuna, dae su 18 de abrile de su 2006, at fatu tretu meda e oe est su standard de sa limba sarda ufitziale. S’isperimentatzione at dadu semper resultados positivos e de profetu. Est beru chi b’at semper calicunu episòdiu isoladu de contrariedade, ma posca non b’at proposta. E sas pagos propostas chi lompent sunt inùtiles. Finas in sos chimbe annos de Cappellacci, cun sos duos assessores Baire e Milia, su traballu comintzadu dae Soru non l’ant tocadu e antzis rispetadu.
Como imbetzes, dae cando Frantziscu Pigliaru est a caddu, totu sa polìtica de sa pianificazione linguìstica est in forsis. Sa Giunta Regionale at fatu cumprèndere prus de una bia chi su sardu no est una prioridade e chi sos finantziamentos si podent fintzas mutzare. E Corongiu no est prus diretore. Su Coordinamentu pro su Sardu Ufitziale, in custos meses, at apretadu meda sa Giunta cun chèscias, protestas, artìculos e propostas. Su guvernu regionale paret in afannu a pitzu de custu tema e s’assessora Firino, in ses meses, est renèssida a agatare mesora pro addobiare sos ufìtzios linguìsticos petzi custa chida.
E tando, sende chi b’at nervosismu, su chi Soru at a nàrrere at a tènnere de seguru un’impatu subra sa polìtica linguìstica. A ogni manera custu est un’eventu a su cale non si podet mancare ca cosas medas de importu chi ant a acadèdessere in sos annos imbenientes, ant a mòvere dae Sedilo a sas chimbe de merie in sa sala Sa Prima Ighina.
Leave a comment