Oe prus o mancu a mesudie in sos telefoneddos chi sunt in Sardigna at a sonare un’allarme, fintzas si sos telefoneddos sunt cun pagu sinnale e finamentas si sunt a sa muda. Non b’at de si assuconare, sa medida serbit pro proare unu sistema de avisu lestru a sa populatzione cando b’at carchi apretu. Unu disàriu, unu fogu chi s’est acurtziende a una zona o un’atentadu puru: sa protetzione tzivile in custa manera betat su bandu a chie est in unu logu e li acrarit ite depet fàghere e in cale manera.
Su sistema no est nou de su totu: est istadu proadu in giassos prus minores: in s’ìsula de Vulcanu e in sas costeras intre Sitzìlia e Calàbria. Mèrcuris l’ant proadu in Toscana, oe in Sardigna, su chimbe de trìulas in Sitzìlia, su sete in Calàbria e su deghe in Emìlia Romagna. Su sistema impitat comente traste pro ispartzinare su messàgiu sas tzellas in sas cales sos telefoneddos si collegant, non impreat cale si siat datu personale nen GPS. Custa borta su messàgiu, in italianu e in inglesu, at a giùghere unu ligàmene pro unu chistionàrgiu chi serbit a sos chi ant ammanigiadu totu cantu pro cumprèndere comente at funtzionadu.
Gabriele Tanda
Leave a comment