Intre sos meses de cabudanni e de santugaine trintabator istudiantes de su Litzeu Azuni de Tàtari ant partetzipadu a su progetu Oikos-Erasmus plus.
Sos iscolanos, acumpangiados dae unu maistru, sunt istados in Germània, Ispagna e Frantza, in ue ant fatu tirotzìnios formativos in entes e aziendas.
Noe de issos sunt istados in Berlinu, trèighi in Salamanca e dòighi in Perpignanu e ant bìvidu in famìllias locales, tenende sa possibilidade de praticare sa limba.
Est su de tres annos chi s’iscola tataresa partètzipat a su progetu. Finas a como sos dischentes de s’istitutu chi ant pòdidu godire de custa initziativa sunt istados 113, totu de sas classes III e IV.
Su litzeu at giai tentu cunfirma chi at a sighire in custa initziativa finas a su 2027. De sas atividade ligadas a su Erasmus plus si òcupant sos professores Jana Bitti, Nicola Cadoni, Pier Paolo Carboni e Patrizia Carta.
Pro sos maistros puru ddo’est sa possibilidade de fàghere formatzione in logu istràngiu a intro de su progetu.
Sa Oikos est una Onlus fundada in Ùdine in su 2005. Si òcupat massimamente de cooperatzione e mobilidade internatzionale e tirotzìnios formativos. Est finas sòtziu in progetos europeos chi pertocant su mundu de s’iscola che a s’Erasmus plus.
S’Erasmus plus est unu programma de s’Unione Europea chi tenet tres obietivos fundamentales. Su primu est sa promotzione de sa mobilidade in su campu de s’istrutzione e de s’imparu. Su segundu favorire sa partetzipatzione a organizatziones e polìticas giovaniles.
Su de tres promòvere sa partetzipatzione de sos giòvanos a organizatziones isportivas.
A s’Erasmus plus partètzipant, a prus de sos istados de sa UE, Liechtenstein, Turchia, Norvègia, Sèrbia, Matzedonia de su nord, Far Oer, Isvìtzera, Regnu Unidu, pro su chi pertocat s’àrea europea, e àteras deghinas de paisos de totu su mundu.
(gianni muroni)
Leave a comment