Ite narat sa prassi? Chi sos libros de istòria sarda si iscrient in italianu. Ite narat su bortulamentu de sa prassi? Chi sos libros de istòria sarda si iscrient in sardu. Custa bortulada l’at fata sa domo editoriale NOR, cun su libru chi si intìtulat “Istòria de Sardigna, dae sa Preistòria a sa prima Edade cuntemporànea”.
Su libru, de 176 pàginas, est essidu in su 2022 in sa collana Paperis n° 2 tenet su formadu in pabìru, sa rilegadura in brossura e cosidura a filu refe e una mannària de 14 x 24 tzm. Su testu est ingalanidu dae sas figuras de s’illustradore casteddaju Bruno Olivieri.
S’òpera est prus apassionante de unu romanzu. Nos nche giughet in unu biàgiu in su tempus dae su Neolìticu a s´Edade de su Ferru, dae su domìniu de Bisàntziu a s’indipendèntzia de sos Rennos Giugales, dae sas ocupatziones catalana, ispagnola, piemontesa a sa revolutzione de Angioy, dae sa trasformatzione de su Rennu de Sardigna in Rennu de Itàlia a sos tempos prus reghentes.
Est unu libru pro pitzinnos e mannos, pro sas iscolas e pro sa formatzione personale de su tzitadinu, un’òpera chi balet a parare fronte a su negatzionismu istòricu chi pro tropu tempus at caraterizadu sa publitzìstica in Sardigna.
Unu libru de comporare, tando, ca non podet mancare in sa libreria de cada domo.
(sa redatzione)
Leave a comment