Finamentas ocannu semus narende chi finamentas ocannu sa natzionale sarda non b’est. Deretu cheret chi cumprendemus si cada borta devimus nàrrere sa matessi cosa finas a s’indipendèntzia (e si custa punna at a pòdere èssere afortida dae custu islogan repìtidu cada bator annos). Si nos acuntentat custa prassi non b’at mancu bisòngiu de sighire s’allega; si imbetzes repetita non iuvant cheret chi carchi cosa de prus la devemus nàrrere.
de Màuru Piredda
Galles e Iscòtzia (mentovados che a esèmpiu inoghe) tenent sa natzionale issoro chi pigat parte a sos campionados Uefa e Fifa e nois (mancari sa presèntzia de sa Federatzione Isport Natzionale Sardu) nono. AB (andat bene), ma cussu est s’ABC. Si sighimus sas lìteras de s’alfabetu bidimus chi cussas sunt duas de sas bator home nations de su Rennu Unidu, countries within a country sunt. Sa Sardigna nono. Paragones intre sos Acts of Union de su 1706/7 e sa Fusione perfetta de su 1847 non podent èssere ogetu de un’artìculu che a custu (e pro seguru b’at chie est prus a tretu de los fàghere).
Ma sa chistione in cue nch’est. Galles e Iscòtzia sunt reconnotas comente natziones. Nois nono. E dae cue movent Uefa e Fifa pro sos campionados issoro. Ca Uefa e Fifa sunt sa Ue e s’Onu de su fùbalu, e duncas sunt organizatziones chi non nche podent barigare sas dinàmicas istatales (est bastante a mirare s’abbolotu pesadu pro sa màllia de s’Ucràina cun in intro su perìmetru de sa Crimea).
Duncas cheret chi sa natzione nostra siat reconnota; cheret chi – si bi la sighimus cun s’esèmpiu de Galles e Iscòtzia – s’italianu siat un’istadu plurinatzionale e chi custa cunditzione siat marcada in sa Costitutzione a sa moda boliviana.
«Bolivia se constituye en un Estado Unitario Social de Derecho Plurinacional Comunitario, libre, independiente,soberano, democrático, intercultural, descentralizado y con autonomías. Bolivia se funda en la pluralidad y elpluralismo político, económico, jurídico, cultural y lingüístico, dentro del proceso integrador del país».
De custa manera semus reconnoschende un’istadu italianu unitàriu? Custa podet èssere s’obietzione. Ma finamentas cando difendimus su regionalismu (allega torrada a campu in tempos de Covid) semus reconnoschende sa Repubblica indivisibile. E, de prus, finamentas su Rennu unidu est unitàriu. Ma custa unitariedade no at impedidu a su pòpulu iscotzesu de pedire s’indipendèntzia sua tràmite referendum.
Posca b’at una chistione. S’Itàlia, in custu che a s’Ispagna, no at a reconnòschere un’eventuale protzessu indipendentista sardu. L’ischimus. Ma su gustu de la bìdere – cara a su mundu intreu – refudende·nos sos deretos natzionales, a nos lu cherimus pigare? Si narat chi eja (ma cheret chi b’apat chie lu pedit e chi l’iscat pedire) bene; si narat chi nono capatze chi alimentet galu de prus sa cussèntzia natzionale de sos sardos.
Àtera chistione: Galles e Iscòtzia tenent sa Premier league issoro. Pregontemus·nos, deretu, si su Casteddu diat prefèrrere a giogare in unu campionadu nostru (e, gioghende contra a Torres, Olbia e àteros, punnare a sa Champions) o in su de sa Seria A de sa Figc (in Grandu Britànnia b’at iscuadras iscuadras gallesas e iscotzesas chi giogant in Inghilterra e carchi iscuadra inglesa chi giogat in Galles e Iscòtzia).
Ma pregontemus·nos finamentas si non siat de giudu a dare impuntza a una rete sarda de isport populare chi si nch’istèsiet dae su mercadu de su fùbalu (chi cun sa Superlega at mustradu galu de prus sa cara sua) e chi agiudet a sa formatzione de una cussèntzia natzionale-isportiva atacada a sa màllia, a sa bandera, e no a su soddu.
Leave a comment