S’azienda Apple est ogetu de un’atzione giuditziària promòvida dae su dipartimentu de Giustìtzia e dae sos procuradores generales de 16 istados americanos.
S’acusa? «Violatzione de sas normas Antitrust». In s’atzione legale faeddant de «conduta illegale ampra e perlongada» chi at impedidu a sos isvilupadores cuncurrentes de pònnere sos produtos issoro a disponimentu de sos utentes.
«Ogni passu fatu dae Apple – si leghet in su documentu – fràigat e afòrtiat su monopòliu in su mercadu de sos smartphone». E galu: «Custa càusa punnat a sa liberatzione de sos mercados de sos smartphone dae sa conduta anticoncurrentziale ed escludente de Apple e a ripristinare sa concurrèntzia pro abbassare sos prejos de sos telefoneddos pro sos consumadores, reduire sos costos pro sos isvilupadores e preservare s’innovatzione pro su tempus benidore».
Sa cuntierra legale at cajonadu conseguèntzias finamentas in s’àmbitu finantziàriu: su gigante de Cupertino at pèrdidu su 3% in bursa.
«Custa càusa – replicat Apple – minetzat su chi semus e sos printzìpios tìpicos de sos produtos Apple in mercados prus chi non cumpetitivos. Si diat àere sutzessu, diat pònnere in perìgulu sa capatzidade nostra de creare su tipu de tecnologia chi sas persones isetant dae Apple, in ue hardware, software e servìtzios si rugrant a pare. De prus, bi diat àere unu pretzedente perigulosu dende a su guvernu su poderiu de intervènnere a manera pesante in sa progetatzione de sa tecnologia de sos tzitadinos. Pensamus chi custa càusa siat isballiada in sos fatos e in sa lege, e nos amus a difèndere cun fortza».
S’atzione contra a Apple biàgiat in pare cun sa normativa europea noa prus chi no astrinta. Su 6 de martzu in sa Ue est intradu in vigore de su Digital markets act (Dma). Sa leget punnat a promòvere prus concurrèntzia in sos mercados digitales e, pro custu, ponet règulas noas a sas aziendas tecnològicas. Gasi Apple s’est bida obligada a autorizare sos utentes pro s’iscarrigamentu de aplicatziones de tertzas partes.
Gianfranca Orunesu
Leave a comment