Israele, protestas contra a su guvernu Netanyahu

Israele, protestas contra a su guvernu Netanyahu

Dies de protesta in Israele contra a su guvernu Netanyahu, su de 6 de “Bibi” e su de 37 de s’istòria de s’istadu dae cando nascheit a pustis de sa segunda gherra mundiale. Eris in Tel Aviv 100mìgia persones o barda ant pigadu parte a una manifestatzione chi nos la contant comente una intre sas prus mannas de sos ùrtimos annos. Ma sas protestas marcant su calendàriu dae su 7 de custu mese. Una de sas chistiones pertocant su pianu de s’esecutivu de dereta pro limitare sos poderios de sa Corte Suprema, cun una riforma chi diat decretare su controllu de sa polìtica subra de custa.

Su guvernu atuale de s’istadu de Israele movet dae una majoria isciovinsta cun su Likud de su premier “Bibi” alleadu cun àteros chimbe partidos: su Shas (chi rapresentat sos ebreos ortodossos de orìgine nordafricana e mediorientale), su Yahadut HaTora HaMeuhedet (est a nàrrere ebraismu de sa Torah unidu, ultra-ortodossu), su HaTzionut HaDatit (partidu sionista religiosu, de estrema dereta), su Otzma Yehudit (Poderiu ebràicu, estrema dereta) e su Noam (estrema dereta).

Est su guvernu su prus a dereta de s’istòria de Israele. E custu cheret nàrrere finamentas una visione de una Palestina chi non cumbinat cun sos disìgios de totu sos abitantes de sa terra santa. Sas essidas de unos cantos ministros lu cunfirmant. Su titulare de sa Seguresa pùblica, Itamar Ben-Gvir, chi a comintzos de ghennàrgiu nch’artzieit a s’Ispianada de sas moscheas, aiat annuntziadu sas dies coladas s’intrada in vigore de sa proibitzione de mustrare in pùblicu sa bandera palestinesa.

Semper in custas chidas est nàschidu unu partidu nou àrabu-ebràicu. Avraham Burg, polìticu laburista, ex presidente de sa Knesset e dae tempus non prus sionista (comente imbetzes sighint a lu èssere sos de sa manca de Meretz), est unu de sos promotores de custu partidu agualitàriu in pare cun su palestinesu Faisal Azaiza, prèside de sa facultade de Previdèntzia sotziale de s’Università de Haifa.

Su nùmene est “Pro totu sos tzitadinos suos”. Su caminu diat pàrrere comintzadu, forsis fintzas pro more de sa fase polìtica atuale. A bìdere istemus cantu at a pòdere èssere de agiudu pro iscancarare sa narratzione sionista in s’istadu ebràicu e si sa proposta est pro totu sa Palestina (e duncas finamentas pro sa Tzisgiordània e Gaza).

màuru piredda


foto

WORLD ECONOMIC FORUM/swiss-image.ch/Photo Jolanda Flubacher

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *